uMthunywa
KULEZISEBENZI ezintathu zeNational Railways of Zimbabwe (NRZ) ezife ngemva kokuba kungozi yesitimela ngoMvulo.
Kusitatimende isikhulumi seNRZ uMnumzana Andrew Kunambura uthe ingozi le yenzakale phakathi kweMutare leMachipinda ngehola lika 9 ebusuku ngoMvulo.
“Inhlolisiso yokuqala iveze ukuthi isitimela ebesidonsa amatilokisi angu-14 ebesithwele ama-chrome concentrates ayisitshiyagalolunye kunye lamabhulokhu amahlanu e-granite kungenzeka ukuthi imiqobotsho yalile ukubamba. Okubangele ukuthi isitimela sehluleke ukukhona kuhle esihotsheni,” kutsho uMnu Kunambura.
“Ngokusweleka kwenhlanhla izisebenzi ezintathu zeNRZ zehluleke ukuphuma zafela phakathi. Amabizo ngeke achazwe khathesi ngoba izimuli zazo azikaziswa. Ibhodi yeNRZ, ubukhokheli kunye lezisebenzi zonke zakoLoliwe zithanda ukwethula amazwi enduduzo kuzimuli ezilahlekelweyo ebezisebenza nzima, futhi zizimisele emsebenzini wazo. Zizahlala zikhunjulwa yimuli yakoLoliwe,” kutsho uMnu Kunambura.
Kubikwa uphenyo luyaqhubeka ukuze kutholakale imbangela yengozi.
