uMthunywa
Charity Moyo
ZISELE zididekile izakhamizi zeLutumba eBeitbridge kulandela ukufa komntwana oleminyaka engu-11 ngesikhathi esilwa lomunye kubangwa ibhola.
Isiga lesi senzakale ngoMgqibelo kuviki ephelileyo.
Kuzwakale ukuthi umuyi uTalent Tinarwo ubesilwa losowabo oleminyaka yokuzalwa engu-11 ngemva kokuxabana bebanga ibhola okuyikho okucine kubangela ukuthi omunye wabo afe.
Umfakazi obikele uMthunywa uMnumzana Richmore Ndou uveze ukuthi abantwana laba bangomakhelwane njalo bebengabangane njalo bedlala bonke.
Uthe lanxa kuthiwa babebanga ibhola bona kabakwazi ukuthi kuyini okwabangela ukuthi balwe ngoba bona babizwa sekulomkhosi lo.
“Asazi ukuthi kuyini okwabangela ingxabano phakathi kwabantwana laba kodwa bona babizwa sokuthiwa omunye wabo kasekho.
“Omunye umfana ongusowabo owayekhona kusenzakala lokhu uveze ukuthi umfana lo wadonsa isitho sangasese sikamuyi okuyikho okwabangela ukufa kwakhe,” kutsho uMnu Ndou.
Intatheli ikhulumisane lemuli lezi zombili. Okhulume emele abakomsolwa uveze ukuthi kabakwazi ukuthi baqalisele ngaphi ngomonakalo lo.
Uthe kabakwazi ukuthi bazakhangelana njani lemuli yakoTinarwo elahlekelwe ngumntwana ngendlela ebuhlungu kangaka.
“Kuliqiniso ukuthi umntanethu ulwe lomntakamakhelwane okuyikho okubangele ukufa kwakhe. Ngatshaywa luvalo ngaginqa ngisizwa ukuthi umntanami senze ihlazo elingaka.
“Angazi ukuthi sizahlalisana njani lomakhelwane wami ngoba kubuhlungu ukulahlekelwa yingane ngendlela enje. Yithi esathwala umngcwabo wakhe kodwa sihlawulisiwe inkomo,” kutsho uMnu Ngwenya.
UMthunywa ukhulumisane loMnumzana Phineas Tinarwo onguye olomntwana obhubhileyo. Uveze ukuthi kalamandla ngokufa komntanakhe. Uthe yena bezwa sebebizwa ukuthi umntanabo kasekho.
“Ngibuhlungu kakhulu ngemfa yomntanami, ngabe wagula bengizakwamukela.
“Umntwana omncane wayithatha ngaphi ingqondo yokulwa edonsa isitho somunye sangasese, ngempela wayengasoze aphile umntanami,” kutsho uMnu Tinarwo.
Uqhubekele phambili esithi yebo babahlawulise inkomo ezinhlanu kanye lokuthi bathwale umngcwabo kodwa akusoze kuphume enhliziyweni zabo ngoba balahlekelwe kakhulu.
Intatheli ikhulumisane lesikhulumi samapholisa esabelweni seMatabeleland South uSergeant Thabani Mkhwananzi yena othe udaba olunjalo bebengakalwamukeli.
“Kalukafiki udaba olunje endlebeni zethu ngakho sizachwayisisa kabanzi ngalo,” kuphetha uSergeant Mkhwananzi.
