uMthunywa
Thokozile Mbedzi
KULENDODA yesigabeni seSilobela ebulewe kunye lendodana yayo kulandela ukuhlaselwa ngamadoda amathathu besolwa ngokutshontsha obabhemi abathathu, uMthunywa uyakuveza lokhu lamhlanje.
Isehlakalo lesi senzakale mhlaka 28 Nhlolanja emavinkilini esiqintini seBhaparara ilanga selisiya ngomtshawendoda.
Kubikwa uLee Moyo, Mpilo Moyo lo Moffart Moyo abayizelamani balanda uHelken Ncube (54) lendodana yakhe uKhulekani Ncube (24) emavinkilini eBhaparara behlomile bafika babethesa icala lokutshontsha obabhemi bangakibo ngoMpalakazi.
Kubikwa abathathu laba ababevele bephethe induku bahle basusela abakoNcube amanqe besithi bafuna ukufundisa ngitsho lamanye amasela esigabeni.
Ekhuluma lentatheli kaMthunywa omunye umakhelwane othande ukwaziwa ngokuthi nguGogo uMaMloyi uthe lokhe wathwetshulwa yingwe ikhanda selize limhlophe kakaze abone abantu ababulawa ngesihluku esifana lasibonayo.
“Ngimadolonzima ngilapha ngokwenzakale phakathi kwethu. UNcube lendodana yakhe babulewe ngesihluku engizahlala ngisibona ngelihlo lengqondo kubangwa nje ukuthi batshontshe obabhemi hantshi lenkomo.
“Abafana bakoMoyo bafika bahlasela uNcube lomntanakhe uKhulekani ngezinduku. Babebabhaxabula angathi ngabantu ababone imamba ngoba babebatshaya loba ngaphi bengakhethi.
“Vele nje bebatshiya kwasekusele udokoza nje, ngibona bahle bafela khonapha ezitolo lanxa kuthiwa bafa besanda kufika esibhedlela. Indlela ababetshaywe ngayo yasitshiya sonke silesithuli” kulandisa uGogo uMaMloyi.
“Lokhu okwenziwe ngabafana bakoMoyo lihlazo ngithemba abaphathi besigaba kukhona abazakwenza ukuze bajeziswe ngoba isiko lethu abaNsundu kalikuvumi lokhu singacina amadlozi esihlanekela siswele okunengi ngesiga lesi,” kulandisa uGogo MaMloyi.
Isikhulumi samapholisa esabelweni seMidlands ulnspector Emmanuel Mahoko ebuzwa ngodaba lolu uvumile wathi solufikile ewofisini labo ngakho uzulu engabohamba ethwele izikhali.
“Uzulu engabohamba ethwele izikhali ukuze singalahlekelwa yimpilo mahlayana njengalokhu ababili laba bahle babhubha ekufikeni kwabo esibhedlela.
“Sicela njalo labo abangabe belolwazi lokuthi izigelekeqe lezi zingaphi bazise amapholisa ngokusitshayela ucingo, ukubhala izincwadi bafake kuma-suggestion box loba ukutshela amapholisa aseduzane ukuze babotshwe,” kuphetha uInsp Mahoko.
