uMthunywa
Johas Moyo
ZIKHALA ezimathonsi izakhamizi zeMatshetsheni eGwanda kulandela ukulahlekelwa yizifuyo ezinengi ngenxa yokucuba nanko phela akulamadlelo njalo kazilakho ukudla kokuzipha.
Kubikwa ukuthi sezisedlula amatshumi ayisikhombisa inkomo esezifile kulesisigaba kuyonale inyanga kaLwezi kuphela okuyikho osekubangele ukuthi izakhamizi lezi zidinge usizo kuHulumende kanye lakunhlanganiso ezizimeleyo ukuze izifuyo zazo ziphephe.
UMthunywa uxhumane loMnumzana MaCloud Gabula ongunobhala wenduna uMasuku yena oveze ukuthi baphakathi kwelitshe lembokodo ngokufelwa yizifuyo zabo bekhangele njalo kungekho abangakwenza ukuzisiza.
“Siphakathi kobunzima obukhulu kakhulu, izifuyo zethu zifa ebusuku lemini sikhanele kungekho esingazincedisa ngakho ngoba lathi abantu siyalamba.
“Okwenza kubenzima kakhulu yikuthi lamadlelo kasiselawo lapha. Abanye bethu bebedobhe amahlanga lamakiliwane ukuthi baphe inkomo kodwa sekwaphela yikho sezisifa kakhulu kuyonale inyanga,” kutsho uMnu Gabula.
Esinye njalo isakhamuzi sakule indawo uMthabisi Moyo uthe okudanisa kakhulu yikuthi kucuba inkomo ezilamabele (ezimithiyo) ngoba ziyabe zisindwa ngamathole okwenza zehluleke ukuhamba ngoba ziyabe zingelamandla njengoba ziyabe zingadlanga lutho.
“Sidinga uncedo esigabeni sakithi ngoba izifuyo zethu seziphelile phambi kwamehlo ethu. Inkomo ezilamabele yizo ezifa kakhulu ngoba isigaba seMzimuni kasilatshani, lokho kwenza kube nzima kuzo ngoba kuzabe kumele zihambe isibanga eside zidinga amadlelo okuyikho okwenza ukuthi zicine zicuba ngokusindwa ngamathole njalo lendlala iyabe izithaphuzela,” kuphetha uMnu Moyo.
