uMthunywa
YiNtatheli kaMthunywa
UMGCINISIHLALO womdlalo wokuqaga izwe lonke uLetticia Chipandu usebike ukuba baphakathi kokuqoqa amaligi amatsha kuzabelo zonke ukuze umdlalo lo udlalwe laseziqintini ezisemaphandleni, ikakhulu lapho okungela mncintiswano yaphezulu.
UChipandu okhokhela inhlanganiso yeZimbabwe Netball Association utshele uMthunywa esigodlweni ukuthi insika yomdlalo wabo ngomnyaka ozayo yikuthi babumbe amathimu amanengi aphuma eziqintini.
Uthe akusizi ukuthi kuhlale kubunjwa amathimu asemadolobheni khona lemaphandleni bekhona abadlali abalethalenta.
“Ikusasa yomdlalo wethu igxile ekuthini kumele sibe lamaqembu amanengi. Yikho sithe nxa sivula isizini ngomnyaka ozayo, sikhuthaze amathimu asacathula asabalale kuziqinti zonke zelizwe ukuthi abeyingxenye yethu.
“Siyazi ukuthi akhona amantombazana azidlalela i-netball okokukholisa, kodwa siyabakhuthaza ukuthi badlalele lokuphakamisa impilo lethalenta labo,” kutsho uChipandu.
Wengezelele wathi nxa kungaba lamaqembu amanengi alesifiso sokuba ngaphansi kwabo, lokhu kuzabiza amankampani ajwayele ukusekela umdlalo wokuqaga.
Ekuqaleni kwalumnyaka, inhlanganiso yomdlalo ibike ukuba kungenzeka ihlale phansi lamanye amankampani kubotshwe isivumelwano sokuthi kusekelwe ithalenta elitsha. UChipandu uthe lokhe beqhubeka ngokuncenga labo abangancedisa.
“Isimo somkhonomi sihlasele amankampani amanengi, kodwa asidinwa ngokuqoqoda sidinga usizo lokuthi siphakamise umdlalo wethu. Kukhanya kulamankampani athembisayo.”
“Silande ngitsho lamankampani asekele umdlalo ezikolo abalisa iStella Tea, elenkezo encintiswa yizabelo.
Ngomnyaka lo ozayo, sikhangelele ukuthi umdlalo ukhule, uguquke njalo,” nguChipandu lowo.
Kusenjalo amathimu akuligi yakoBulawayo asethembise ukuthi ngomnyaka ka2016 azaletha umncintiswano ongaphezulu. Nyakenye iBulawayo Netball League ibhode idolobho lonke ikhankasa kumantombazana alethalenta lokuqaga ukuthi azibonakalise ngokuba yingxenye yomdlalo. Abaphathi bomdlalo kulelidolobho bathe umkhankaso wabo wafinyelela ezikolo lakumakilabhu ekhansili belomqondo wokuthengisa umdlalo kumantombazana angakabi leqiniso lokuthi afuna ukwenzani kwezemidlalo.
