uMthunywa
Arnold Ndlovu
KULABOMAKOROKOZA abane ababhubhe ngeviki ephelileyo ngemva kokudilikelwa ngumgodi eVova Mine eGwanda.
Omakorokoza laba abadabuka eGwanda kubikwa badilikelwe ngumgodi bafela phakathi ngoLwesithathu ngeviki ephelileyo bengaphansi komgodi, uMthunywa ukuzwile lokhu.
Ekhuluma lephephandaba omunye umfakazi uMnumzana Zenzo Moyo uveze ukuthi umgodi lo kawukho emthethweni njalo abantu bagebha ngenkani ngoba kuthiwa ulemali.
Kubikwa umgodi lo wavalwa kudala ngoba ungasaphephanga ukuthi abantu baqhubeke begebha kuwo.
“Okungabe kubangele ukuthi amajaha la acine esifa yikuthi badilikelwa ngumgodi ngezikhathi zebusuku njalo abantu baze babona ekuseni ukuthi umgodi udilikile kungakho lesikhathi sasehambile ukuthi babengathola abantu laba abadilikelwe ngumgodi besaphila,” kuchaza uMnu Moyo.
Uqhubekele phambili wathi omakorokoza laba bangena ebusuku emgodini lo besiyagebha.
“Okubi yindaba yokuthi omakorokoza laba bahamba ukuyagebha ebusuku, nxa sesikhangela phose minyaka yonke bakhona abafela emigodini eminengi etshiyeneyo endaweni le yakithi.
“Okubi yikuthi abantu laba abalaleli nxa bexwayiswa ngengozi abazifaka kiyo kodwa bona bakhangela ukwenza imali kuphela ngoba baqhubekela phambili belokhe bengena ngaphansi kwemigodi le,” kuchasisa uMnu Moyo.
Isikhulumi samapholisa esabelweni seMatabeleland South uInspector Philisani Ndebele uthe indaba le ibingakafiki endlebeni zabo.
“Umbiko lo ubungakafiki endlebeni zethu kodwa njengabantu bomthetho sizadingisisa kabanzi ngodaba lolu,” kuphetha uInsp Ndebele.
