uMthunywa
Nomthandazo Ndlovu
KULENDODA yelokitshini leSpitzkop eGwanda esele ibambe isisila sejuba umfazi semithiswe nguBen 10 wahle wayitshiya.
Lesi siga senzakale ngoLwesihlanu lweviki ephelileyo lapho uNkosazana Belinda Dube atshiye khona umkakhe uDarlington Maseko ngoba esezithwele umthwalo kaBen 10 okutholakale ukuthi nguThamsanqa nje kuphela ohlala kwelinye ilokitshi abezijabulisa ngaye.
Ekhuluma loMthunywa omunye umfakazi othande ukwaziwa ngokuthi nguMaNkiwane kuphela uthe ukuganga kukaNkszn Dube loBen 10 lo sokulesikhathi kwaqala.
“Abantu laba sebelesikhathi baqala into yabo le, uMaseko yena vele kahlali lapha, ngumalayitsha, kumbe yisizungu yini esimenze wenza lokhu.
“Umfana lo, uThamsanqa laye ugangile. Kalandaba lokuthi uthandana labantu abadala kulaye, khathesi semithise umfazi womuntu wahle watshiya indoda,” kutsho uMaNkiwane.
Omunye umakhelwane walaba ababili othe unguMnumzana Thembani Tshuma uthe okwenzakala phakathi kukaMaseko loMaDube kunzima ngoba uMaseko uyala uthi isisu akusisakhe.
“Kwalwiwa lapha mhla uMaseko exotsha umkakhe esithi ulesisu esingasosakhe, kukhanya wayevele sezwile ukuthi uthandana loThamu,” kutsho uMnu Tshuma.
Ebuzwa ngodaba lolu uMnu Maseko walile ukukhuluma wathi yena kakhulumi indaba zomuzi wakhe lentatheli.
“Angifuni kukhuluma labantu engingabaziyo ngendaba zomuzi wami, ngizazilungisela ngedwa okonakeleyo,” kutsho uMnu Maseko.
UNkszn Dube uthe yena kuliqiniso ukuthi uzithwele isisu somuntu ongasimkakhe kodwa akusiphutha ngoba nguye imbangela yalokho.
“Liqiniso sibili angisahlali laye umkami, okwenze mina ngazwana loThamu yikuthi laye uselomfazi khonale eGoli, bengisithi nxa ngifona kuphendule umfazi. Bekumele mina ngenzeni ngoba umkami ngingasamazi lapha ngoba lami ngilemizwa?
“Abantu balapha bona bayakhuluma kuphela kodwa abakwazi ukuthi isisusa salokho kuyini, abantu kumele bafunde ukukhuluma into abaleqiniso layo, bengakagconi umuntu,” kutsho uNkszn Dube.
Imizamo yokukhulumisana loThamu yehlule ngoba ucingo lwakhe belusala ukungena.
