uMthunywa
BESEKUYISIKHATHI eside behlala ngokuzingelwa abesifazane ababili abadutshulwe babulawa emzini wabo eMthekwini, eHluhluwe ngezikhathi zakusihlwa ngeviki ephelileyo. UNkosikazi Sarafina Manqele (80) lendodakazi yakhe uNkosazana Busaphi Manqele (40) bangenelwe ngababulali abangaziwayo abafike bangakhulumi lutho bavulela ngezulu lezandla bebhekise kubafi.
Kulesi sehlakalo kudutshulwe lomfanyana oleminyaka engu-16 okubikwa ukuthi udutshulwe engalweni. UBusaphi wehlelwe yilo mshophi ngoba efike ekhaya evakatshele unina njengoba isikhathi esinengi ubesichitha lapho abehlala khona ngenhloso yokusondelela umsebenzi njengoba ubenguthitsha kwesinye sezikolo zaseMtubatuba, iBhoboza Primary School. Kuthiwa ngoLwesibili bafikile ababulali begqoke izigqoko ezivala ubuso okuthe uma bebona ukuthi kayenzeki into abebeyihlosile babuyela emuva.
Ngokutsho kwelunga lomdeni elicele ukuba kugodlwe imininingwane yalo, liveze ukuthi ukubulawa kwamalunga alo mdeni kuhlobene lezinsolo ebezibhekiswe kuNkkz Manqele obesolwa ngokuthi uyathakatha. “Kudala baqala ukukhuluma kabi ngogogo kuthiwa uyathakatha. Lezi zinkulumo bezikhulunywa zicine sezithinta lendodakazi yakhe abulawe layo, kuthiwa useyifundise umsebenzi wakhe wokuthakatha,” kutsho lona.
Intatheli ikhulume loMnumazana Sabukusho Manqele oyinduna yalindawo futhi olilunga lomdeni oveze ukuthi lesi sehlakalo sitshiye abantu abanengi betshaqekile endaweni. Uthe omakhelwane babafi baveze ukuthi bezwa ukuqhuma kwesibhamu okuthe kusenjalo kwabonakala kuphakama ilangabi lomlilo.
“Ngithole umbiko ngezithuba zantambama ngokuthi sekudutshulwe umama lodadewethu lapha ekhaya. Kudala baqala ukumhlukumeza umama. Bebemthathela lembuzi zakhe. Abanye bazithathe ngenkani ngoba becuphe ulaka. Silethemba lokuthi amapholisa azosebenza ngokuzimisela ukuze kuqinisekiswe ukuthi ababulali bayabotshwa ngoba benze isihluku. Okubi kakhulu yikuthi ugogo ubehlala lezingane ezimbili kungakho sokuzakuba nzima ukuphila kizo. Udadewethu ubenguthitsha ,esikolo abefundisa kiso kuzakuba nzima ukuchazela abafundi ukuthi ungaphi uthitsha wabo,” kutsho uManqele.
Okhulumela amapholisa KwaZulu-Natal uLt Colonel Nqobile Gwala uthe amapholisa eHluhluwe avule amacala amathathu okungelokubulala, elokuzama ukubulala lelokutshiswa kwempahla. Uqhubeke wathi kusolakala ukuthi abasolwa abathathu bangene endlini obekuhleli kiyo izisulu ezileminyaka ephakathi kwengu40 le-80 ubudala bangakhulumi lutho kulalokho bavulela ngenhlamvu bebhekise kubafi.
“Izisulu ezimbili zitshonele endaweni yesehlakalo. Umfana (15) udubulekile. Kabagcinanga lapho abasolwa njengoba babuye batshisa lendlu obekuhleli kuyona izisulu. Uphenyo luyaqhubeka,” kuphetha uGwala. -Ilanga
