uMthunywa
Ethel Ncube
UKUSEBENZISANA kwamapholisa koBulawayo kuphathise ukuthi kubotshwe indoda lomkayo, kanye labanye ababili okucatshangelwa ukuba yibo abahamba phambili ekutshontsheni intambo zamagetsi edolobheni leli.
Amapholisa ancwetshwe indlebe ngumphakathi kumaviki amabili edluleyo adingisisa, andubana abane laba babotshwe ngoMgqibelo eMahatshula belentambo zamagetsi ezingaphezulu kwamathani amahlanu.
Phakathi kwalaba ababotshiweyo, kuloTapfumaneyi Muzarabani lomkakhe uTracy Ncube, labanye ababili akade besebenzisana labo uAlan Mudjiwa loHebron Chiyangwa.
Isikhulumi samapholisa koBulawayo uInspector Abednico Ncube uncome umphakathi ngokunanzelela izenzo zalaba okuyikho okwenze babikela amapholisa aqala ukudingisisa baze babotshwa.
“Idolobho lakoBulawayo lilwisa ukutshontshwa kwentambo zamagetsi njalo lokhu sekwenze saze sacela usizo lwabacuphi beHomicide ukuze sibophe lababantu.
“Samukela umbiko uvela kumphakathi okuyikho okwenza sayahlola endlini le, eseMahatshula. Sathola belentambo zamagetsi ezedlula amathani amahlanu ebezifakwe emakamelweni amabili,” kuchaza uInsp Ncube.
Uthe bakholwa ukuba uMuzarabani lomkakhe yibo akade befihla impahla le etshontshiweyo ebikhangelelwe ukuyathengiswa kwenye indawo.
“Umninindlu uleminyaka engu-64 uhlala kwenye indawo njalo ubengelalwazi ukuthi indlu yakhe ibisetshenziswa ukugcina impahla etshontshiweyo.
Kusenjalo, amapholisa ngoLwesithathu kuviki ephelileyo abophe indoda eleminyaka engu-36 yelokitshini leMganwini etholakale ilentambo zamagetsi ezingaba ngamathani angu-1, 5.
Umetheswacala, othe ungumeli wenkampani yeHarare ebizwa ngokuthi yiReczone Private Limited uveze ukuthi intambo lezi ubezigcinele inkampani le.
U-Insp Ncube uthe amapholisa ancwetshwa indlebe ukuba umetheswacala ulentambo zamagetsi okunakanelwa ukuthi zatshontshwa kulayini yeZimbabwe Electricity Transmission Distribution Company (ZETDC).
Ekuchwayisiseni kwamapholisa kwatholakala ukuthi intambo lezi ngeze-ZETDC njalo okunye ngama-transformer coils. Kwatholakala intambo ezingaba yi-1 380,5kgs phakathi kwazo eziyi-571 zazingeze-ZETDC.
Amapholisa ananzelela ukuthi ulecence lokuthengisa intambo zamagetsi kusukela mhlaka 19 Nhlolanja lonyaka kusiya kumhlaka 18 Nhlolanja 2025 eyanikwa umqhatshi wakhe.
