uMthunywa
Thokozile Mbedzi
ZlLOKHE zibabaza izakhamizi eziseduzane lepulazi leGilman Farm eLower Gweru ngemva kokuba amanye amadoda etshontshe inkomo ngeviki ephelileyo.
Kubikwa uBusisani Sibanda oleminyaka engu-39 oweDrawcard Farm, uEmmanuel Moyo oleminyaka engu-40 yokuzalwa oweMantiya Village, uEphraim Mazinyane oleminyaka engu-40 oweMantiya, Takurai Gumbo oleminyaka engu-53 owe Ensors Farm loCalvin Gumbo oleminyaka engu-25 we-Ensors Farm oweVungu bonke laba ngabeLower Gweru babotshwe ngamapholisa besetheswa icala lokweba inkomo ezingu-35.
Ekhuluma lentatheli kaMthunywa isikhulumi samapholisa eMidlands uInspector Emmanuel Mahoko uthe babophe amadoda amahlanu ngecala lokutshontshwa kwenkomo.
uInspector Emanuel Mahoko
“Sibophe amadoda amahlanu ngamacala okutshontsha okwamahlandla amabili. Okwakuqala bekumhlaka 1 Mpandula 2022 okwesibili mhlaka 5 Lwezi 2022.
“Amadoda la aquma ucingo ukuze inkomo lezi zithintekele phandle kwepulazi.
“Omunye wabasebenza lapha nguye owathola ucingo luqunyiwe kwahle kwabikelwa amapholisa.
“Amapholisa athola udletshana ngodaba lolu ngakho kwasekubotshwa uBusani Sibanda kwatholakala inkomo ezintathu kuye njalo esezifake umtshiso wakhe.
“Amapholisa aphenyisisa ngodaba lolu okwacina kubotshwa uTawurayi Gumbo lomntanakhe uCalvin Gumbo lapho okwatholakala njalo inkomo ezingu-8 kubo.
“Ezingu 25 zatholakala kubosomapulazi abaseduzane bona abasebethenge inkomo lezi kubasolwa laba.
“Kuphenyo lolu kuvele ukuba uEmmanuel Moyo ubelecala njalo alidala eFort Rixon elokuzama ukubulala.
“Inkomo ezingu-33 yizo ezitholakeleyo labasolwa laba njalo sebehanjiswe edale ukuze bafinyelelwe yisandla somthetho.
“Amapholisa athanda ukubonga uzulu ngokuqhubeka ephathisa ngokuletha imbiko eqotho ephathisa ukuba kubotshwe abephula umthetho.
“Abafuyileyo baxwayiswa ukuba kababikele amapholisa ngokuphangisa nxa benakana ukuba izifuyo zabo zitshontshiwe.
“Abanini bamapulazi kabaqaphelisise kakhulu ukuba izisebenzi zabo zenzani ngaso sonke isikhathi,” kuphetha uInsp Mahoko.
