uMthunywa
Thokozole Mbedzi
ZIWAKHALELE amadoda amabili abesehluphile ngokutshontsha inkomo esigabeni seVhelemu, eChiredzi kulandela ukutshontsha inkomo ezingu-13 ngeviki ephelileyo.
Kubikwa uBefrank Chirilele, oleminyaka engu-33 lo Peacemaker Njenjekwa oleminyaka engu-26 babotshwe ngesikhathi beqhuba inkomo bezisa lapho akade bemise khona imota yokuzithwala.
Ekhuluma lentatheli kaMthunywa uMnumzana Khumbulani Sibanda uthe inkomo zabo zisinde ngokulambisa ekutshontshweni ngamasela.
“Amadoda lawa afika lapha esigabeni sethu antshontsha inkomo zikamakhelwane, yena owahle wasibikela sonke njengomakhelwane ukuba inkomo zakhe kaziboni.
“Omunye umakhelwane wababikelweyo uthe ezihambela wabona kume imota ebisidingiwe ukuthi izothwala inkomo.
“Umakhelwane lo wahle wakhangelisisa imota leyi wabona ukuba inengi lazo eziyabe zifakelwe insimbi zisetshenziswa ukuba zithwalwe ngazo inkomo.
“Kazange abe esaphuza kodwa wahle wabikela umakhelwane owayethe inkomo zakhe kaziboni ukuba kulemota emileyo ekhanya ilindele ukuthwala kodwa ifanana lezimota okuthwalwa ngazo inkomo ngoba itshiselwe izinsimbi,” kulandisa uMnu Sibanda.
“Umnikazi wenkomo wahle waphanga wabikela amapholisa njalo wahle waya lapho obekume khona imota le.
“Amapholisa esethole udletshana lolu aphanga ayalapho okwakume imota le afika abuza umtshayeli ukuba kungani emise imota waveza ukuba uqhatshwe ngamadoda amabili afuna ukuba awathwalele inkomo zawo.
“Ngenhlanhla enkulu amadoda lawo athutsha eqonda lapho okumi khona imota eqhuba inkomo ezingu-13 ahle abotshwa,” kutsho uMnu Sibanda.
Isikhulumi samapholisa esabelweni seMasvingo uInspector Kudakwashe Dewa ebuzwa ngodaba lolu uvumile wathi solufikile ehofisini yakhe.
“Udaba lwamadoda amabili aqhatshe imota efuna ukuba athwale ngayo inkomo ayezintshontshile solufikile ehofisini yethu.
“Amadoda lawa amapholisa awabophile ngemva kokuba esethole udletshana lokuba kulemota izakhamizi ebezingayizwisisi njalo esinye isakhamuzi sicatshelwe zinkomo zaso,” kuphetha uInsp Dewa.
“Amapholisa athanda ukubonga uzulu ngokusebenzelana kuhle njalo kabaqhubekele phambili.
“Abasolwa laba bazamiswa emthethwandaba ukuze ingalo yomthetho idlale indima yawo, kuphetha uInsp Dewa.
