uMthunywa
Bongani Ndlovu
KUZABE kungabizwa ozwayo enkundleni yeSomhlolo Stadium eLupane lapho okuzabe kudlala khona iSt Luke’s United FC leTongogwe United kudlalelwa inkezo yenkululeko.
Amaqembu la womabili avela esigabeni seLupane azadibana ngoLwesine emini ebanga i-Independence Cup.
Ekhuluma lentatheli kaMthunywa uAberson Mahlangu onguye umqoqi wenkezo le, ubikele iphephandaba likazulu ukuba indikimba yomdlalo wangoLwesine yikudlalela inkululeko kanye lokuzithokozisa.
“Indikimba yomdlalo wangoLwesine yikuzilibazisa sizithokozisa lokudlalela inkululeko ngoba kulilanga lapho iZimbabwe eyabe isenelisa iminyaka engu-39 yathola uzibuse.
“Imidlalo le isilemnyaka eminengi idlalwa iloba ike yamiswa ngomnyaka odluleyo ngokungahlangani kwezimali lokuswelakala kwabaxhasi kodwa lonyaka siphendukile njalo ngomfutho,” kuveza uMahlangu.
Uqhubekele phambili waveza ukuba sekusele amaqembu amabili azadlala ngoLwesine kumqhudelwano okade ulamaqembu alitshumi.
“Imidlalo yendebe ye-Independence ibilamaqembu angu-10 wonke adlale ngempelaviki edluleyo mhlaka 13 lo 14 Mabasa ukuze sisale lamaqembu amabili azingqwele ayiwo azadibana kunkezo yenkululeko ngoLwesine emini eSomhlolo,” kuchaza uMahlangu.
Ugcizelele ngokuthi imidlalo le iyancedisa ukuthi ithuthukise abadlali lamaqembu ngoba abanqobayo kukhona abaphuma lakho ukuze bebonise ukuthi yibo omanqoba.
“Imidlalo le iyancedisa ukuthuthukisa abadlali lamaqembu ngoba abadlali badlala ngokukhulu ukuzimisela lapho kudlalelwa inkezo le njalo labo abadlali bayathola ithuba lokuthola izicoco zabadlali lokubonwa ngamaqembu amakhulu angaphandle kweLupane.
“Amaqembu lawo ayathola ukuthuthuka ngoba kukhona izipho eziphiwa iqembu elinqobe kulo umqhudelwano okufana lamabhola, ama-kits, ama-nets kanye lemali yokusiza iqembu kunhlelo zalo,” kuphetha uMahlangu.
