uMthunywa
KULESITSHO sesiNtu esithi ikhotha eyikhothayo, njalo esinye sithi ameva ayabangulana, ngiphinde ngilikhumbuze ukuthi kusasa kuyizolo, ngicela livule indlebe lingizwe kahle.
Izizalwane zeZimbabwe ziyakwazi mhlophe ukuthi nxa zizavakatshela elizweni lenu kumele zibe lezincwadi zokufakaza ukuthi zivumelekile ukuthi zibe khonangapho, kodwa ngezizatho ezithile bazithola sebeqhatshiwe emafekithali khona ngapho njalo labaqhatshi bayabathanda ngoba besebenza nzima, gadalala okwenkunzi yembongolo ejahe ukuya emasimini iyelandela ezinsikazi ezixotshwayo.
Ngesikhathi lingakatholi uzibuse inengi lenu laphuma lafulathela lazocatsha lapha laba yiziphepheli elizweni lakithi, ngikhumbula amanye amalunga omkhonto wesizwe achapha eza ngapha baxhumana labe Zipra bancedisana kulwiwa lobandlululo, phela abelungu umuntu onsundu babengamenzi muntu bemthatha sanyamazana yona esikholelwa ukuthi nxa ingaholwanga ayenelisi ukuzicabangela.
Abanye babelimala belatshwe baze baphole befihliwe emagudugudwini baze baphole baqhubeke ngempi, batshiya njalo bezele abantwana abanye libabona besiza kini bazodingisisa imikhondo yaboyise.
Banengi njalo abafunda kithi lapha abasicwininiza isiLungu kuhle kuzwakale ukuthi lomuntu wafunda eZimbabwe okulabantu abaqeqetshileyo.
Angitsho ukuthi ngiyalibalisela kodwa ukuthi abakithi sebengapho noma bengela zincwadi libabulale ngendlela ebuhlungu, okwemamba elophaphe ekhanda njalo ikhafulele umntanenkosi.
Okungcono-ke yikuthi bonke abangela zincwadi labephula umthetho libabophe likhweze izigwebo zabo bezwe ubuhlungu, hatshi ukugongoda umuntu liphinde limtshise afe egonyuluka umuntu okwecimbi elifuswayo.
Into okumele libe yazi yikuthi abelungu bonabo elizigqaja ngabo inengi labo ngelabaleka kweleZimbabwe ngoba bengavumelani lohlelo lokuthi kumele umhlabathi wabiwe, njalo bayazi mhlophe ukuthi umuntu waseZimbabwe uyasebenza okwamagama ngoba siphile labo lapha okwesikhathi eside njalo balutshwane abakwelakithi abangazi ukubhala lokubala.
Le Bhayibhili incwadi eNgcwele liya yala lithi ungabulali pho-ke lina lingobani eliphikisana lomyalezo kaMvelingqangi, khangela lathi ukubulala kweza izulu elinengi lona kwezinye indawo zenu, mhlawumbe yiyo indlela uNkulunkulu aphindisela ngayo ngoba seleqe umyalezo wakhe, njalo angikamboni ophikisana lemiyalezo kaNkulunkulu oba lempilo enhle labafundisi bangangifakazela.
Asihlaleni phansi sixoxisane silungise ingxaki zethu, hayi ukududulana.
Ayixabene.
