uMthunywa
Cornelius Luphahla
IZAKHAMIZI zelokitshini leNew Magwegwe zikhala ngokwanda kobugebengu kanye lokungaziphathi kwabantwana bakule indawo okucatshangelwa ukuba kungezelelwa yi-sports bar ekule indawo.
Ubugangi lobu kubikwa buqale ngemva kokuvula kwe-sports bar le okusuka kudale ukuba izakhamizi zakule indawo zifise ukuthi ivalwe.
Ubugangi lobu bugoqela ukungaziphathi kuhle kwabantwana, ubusela, ukudlwengulwa kwabantu kanye lokungahloniphi kwabantwana bakule indawo.
UMthunywa uvakatshele kulelilokitshi wakhulumisana lesinye isakhamuzi sakule indawo uMnumzana Thabani Moyo wachaza ukuthi i-sports bar le sebekhathele ngayo njalo yavulwa bengakwazi.
“I-sports bar le sesikhathele ngayo ngoba akusahanjwa lapha ebusuku ngenxa yayo.
Ngitsho ngoba nxa uthe wabuya ebusuku uvela emsebenzini kumbe kwezinye indawo uthola abafana begcwele endleleni bephuma e-sports bar bakutshaye bakutshontshele imali lempahla.
Okubuhlungu yikuthi kasizange sitshelwe njengezakhamizi ukuthi kuzakuba le-sports bar lapha. Sezwa nje isivuliwe,” kutsho uMnu Moyo.
UNkosazana Similo Mabhena ubikele intatheli ukuthi okwenza bale ukuba i-sports bar le ibekhona yikuthi idala ukungaziphathi ebantwaneni abancane.
“Okwenza sithi i-sports bar le ivalwe yikuthi isifundise abantwabethu ukuganga. Ngitsho ngoba abantwana abanengi lapha bahlala bodwa ngakho bayasuka bayegida ebhawa le benatha utshwala njengoba bayabe beswele ongabakhuza.
Abanye babo abangamantombazana basuka lapho bathengise imizimba yabo nxa sebedakiwe okuyingozi kakhulu ngoba kungabathelela umkhuhlane.
“Okusidanisayo njengabazali babantwana yikuthi abanikazi bebhawa kanye lamapholisa alapha bayabavumela abantwana abancane bengena ebhawa. Asazi ukuthi kungani bekwenza lokhu bona besazi ukuthi akuvunyelwa.
“Okungimangalisa kakhulu yikuthi umninibhawa lo uthi wayifaka ngenjongo yokuqhatsha abantwabethu okuveza ukusithuka ngoba ubaqhatsha ukuthi bathengise imizimba yabo, abanye babangamasela sebedakiwe,” kutsho uNkszn Mabhena.
UMgcinisihlalo weMagwegwe residents Association uRetired Officer General Titus Mxotshwa ubikele intatheli ukuthi isifiso sabo yikuthi i-sports bar le ivalwe ngoba isihluphile.
“Thina njengezakhamizi sifisa ukuthi i-sports bar le ivalwe ngoba yiyo esisidalela inhlupho ezinengi.
Ngesikhathi ingakabi khona abantwabethu babengakwenzi ukuganga lokhu abakwenzayo njalo babengahambi ebusuku,” kutsho uMnu Mxotshwa.
UMayor wakoBulawayo uMnumzana Martin Moyo etshelwa ngale indaba uchaze ukuthi abazali kufanele baqinise umthetho ezindlini zabo.
“Ukuganga kwabantwana kungabe kudalwa yikuba khona kwe-sports bar kodwa into eqakathekileyo yikuthi abazali baqinise imithetho ezindlini zabo abantwababo bengaphumi phandle kungatshona ilanga.
Okunye njalo kufanele ukuthi abazali bengatshiyi abantwana bodwa. Kuqakathekile njalo ukuthi amapholisa ale ibhawa engavumeli abantwana abangaphansi kweminyaka engu 18 ukuba bangene kule ibhawa,” kutsho uMayor uKhansila Moyo.
Imizamo yokukhulumisana lomnikazi we-sports bar le yehlule ngoba izisebenzi zakhe zalile ukumveza ukuthi ngubani njalo ungaphi.
