uMthunywa
UGATSHA lwezemfundo yaphansi leyaphezulu luthe kuqakathekile ukuthi izikolo zilandele imilayo eyabekwa nguHulumende kanye lenhlanganiso ebona ngezempilakahle emhlabeni wonke jikelele, iWorld Health Organisation ukuze kuvikelwe ukumemetheka kwegcikwane leCovid-19.
Inkuthazo le iza ngemva kokuvulwa kwezikolo ngoMvulo kuyonale iviki.
Omkhulu obona ngokukhitshwa kwemibiko kugatsha lwezemfundo uMnumzana Taungana Ndoro uthe ababalisi kunye labazali kumele benze isiqinisekiso sokuthi abantwana balandela yonke imilayo eyabekwayo ukuze bahlale bevikelekile.
“Ukugqoka izayeke, ukungasondelelani kanye lokugeza izandla njalonje ngamanzi alesepa kumbe ngamasanitisers ngokunye okungenziwa ngabantwana ukuthi bangabambi umkhuhlane weCovid-19. Izikolo zindawo lapho okuhlangana khona abantu abanengi kakhulu kungakho-ke kumqoka ukuthi imithetho ilandelwe ukuze kuvikelwe ukumemetheka komkhuhlane lo.
Uthe ababalisi balomlandu wokubona ukuthi abantwana bathole imfundo eyeneleyo bengakabhali imihloliso yabo.
“Ucwaningo esilwenze kuvulwa izikolo luveze ukuthi ababalisi abayisilinganiso esingange 60 phesenti bayahamba emsebenzini okuyinto enhle nanko phela abantwana abasesikolo yilabo ababhala imihloliso yabo ekupheleni komnyaka.
“Lokhu kutshengisela ukuthi ababalisi balesifiso sokufundisa abantwana nanko phela besebehlale emakhaya okwesikhathi eside njalo lesi yisikhathi esimqoka kibo abafundi esokuthi balungiselele ukubhala imihloliso.”
Uphinde wakhuthaza ababalisi abangakahlatshwa ijekiseni yokuvikela iCovid-19 ukuthi baphange bayohlatshwa nanko phela zinengi indawo lapho abangakwenza lokhu.
Wengezelele wathi kuyisifiso sogatsha ukuba ababalisi bonke bahlatshwe ijekiseni le.
Uthe kumqoka njalo ukuthi abafundi bangafika iminyaka evunyelwa ukuhlatshwa ijekiseni le baphange benzenjalo.
Ngeviki ephelileyo iKhabhinethi yenza isinqumo sokuthi abantwana abaleminyaka yokuzalwa ephakathi kwe 14 le 17 labo sebengayahlatshwa ukuze labo bavikeleke kugcikwane leli.
