uMthunywa
Pumulani Mpofu
Zinengi izehlakalo esidibana lazo empilweni njalo ezikhathaza umoya wethu. Lezi zehlakalo zigoqela imikhuhlane, ukufa kanye lokunye okunengi. Kukho konke esihlangana lakho empilweni ukufa yikho okusihlukumezayo kakhulu.
Izikhathi ezinengi nxa kufiwe abantu bakhala baze bazibhuqe phansi kodwa-ke ngokuxoxisana kwami labantu abanengi eTrinity Project ngithi, “Kasikhale ngelihlo elilodwa ngoba ungalalisa inkophe uphaphama sokonakele okunengi.” Ngiyazi ukufa kuyinto ebuhlungu kodwa kubuhlungu ukusala udubeka ngoba usuthathelwe ilifa lakho ngabantu abazenza izihlakaniphi.
Kule iviki ngithole ithuba lokuxoxisana lomfelokazi othiwa nguKudzai Mhofu. UKudzai wayethethwe nguKudzaishe Hove ngokwesiko njalo bazala abantwana ababili uTendai kanye loTatenda Hove. Bobabili babethenge imota kanye lempahla zendlini kodwa bengelandlu. Ababili laba babeloja edolobheni laseHarare. Konke lokhu bakwenelisa ngoba uKudazishe Hove wayesebenza enkampanini yeNgwebu. UKudzaishe wahlatshwa ngumkhuhlane wagula wabhubha wasengcwatshelwa kibo eBikita.
Ekumngcwabeni lapho uKudzai Mhofu wayedabukile kakhulu ngakho kazange ahambe lezihlobo zomkakhe ukuyathatha incwadi yokufa komkakhe.
Ekufikeni kwabo emahofisini bathatha incwadi yokufa bathi umuyi wayelomfazi kodwa onguye owasayinayo esengumkakhe ngudadewabo abazalwa bonke kumama hatshi kubaba njalo ubuhlobo babo abukhanyi kalula ngoba unina kazange abathathise incwadi zokuzalwa. Ekuphindeleni kwabo ekhaya kabamazisanga uKudzai ukuba bahambe njani ekuthatheni incwadi yokufa komkakhe kodwa bavela nje bamazisa ukuba imota kumele iphiwe umnewabo kamuyi ngoba uKudzai Mhofu kasoze enelise ukuyiphatha kuhle njalo ungumfazi usengacina ekhomba amandla omuyi adliwe ngenye indoda.
Impahla kwathiwa kumele zabiwe ngoba umnikazi wazo usebhubhile. Kwamzwisa ubuhlungu uKudzai kodwa-ke uninazala wasesithi kazingabiwa impahla ngoba abantwana bazazisebenzisa.
UKudzai wasuka-ke waqonda emahofisini e-pension kodwa bamazisa ukuba kufuneka incwadi yokufa komkakhe kanye lezincwadi zabantwana zokuzalwa. Wabuyela kwabozala wayacela bamupha kodwa-ke ekufikeni kwakhe e-pensions office bananzelela ukubana incwadi yokufa ilotshwe umfelokazi ongayisuye uKudzai Mhofu ngakho-ke kumele bayelungisa incwadi yokufa.
Ububi bakhona yikuba uKudzai kasakwazi ukuba abakwabozala angabathola ngaphi ngoba kuzwakala angathi sebathutha eBikita. ETrinity Project sameluleka ngokubana kadinge udadewabo womuyi ukuze ayechaza emahofisini (Registry Office) ukubana kungani ezithi ungumkakhe kamuyi. Lobubunzima sobudale ukuba abantwana bangasafundi ngoba unina engumuntu ohlala egula njalo kenelisi ukuba ababhadalele imali yesikolo (school fees).
Ingqobe ngiyitshiya kumphakathi, asiqaphele ezikhathini zokufa ngoba siphila lamaganyane ezimulini zethu ezihahabela ilifa labanye.
Asihlanganeni njalo kuviki elizayo.
Umlobi utholakala kunombolo zocingo ezithi 0773195055 loba kukheli ethi [email protected]
