uMthunywa
INYANGA kaMpalakazi inzima bakwethu ngoba isilethela imisebenzi eminengi kunye leziphithiphithi ezithile.
Kulenhlelo ezaziwayo ezigoqela ukunanzwa kwabesifazana ngokulwisana lokuhlukuluzwa kwabo ezindlini; ukuhlanyelwa kwezihlahla elizweni lonke jikelele; ukuvalwa kwezikolo; amakhefu abalisela phakathi elezikolo, elomanyano wakuleli, eleKhisimusi lelomnyaka omutsha u2016 ngoba lilungiselelwa lonyaka. Inhlelo zamunye ngamunye kasisazibali ngoba zinengi kakhulu abantu bebuthana, bebonana lokuqhuba lokhu lalokhuya.
Yiso-ke isikhathi esixoxisana sikuso lamuhla. Inkuthazo yethu emqoka ngeyokuthi abatshayeli bezimota lathi sonke izihambi kasixwayeni umthetho wezasemgwaqweni njalo siyisebenzise ngonanzelelo imigwaqo yethu le ukuze senqabele izingozi. Kasisoze sigxile kakhulu kulesosixwayiso ngoba kundatshana yethu edluleyo sathembisana ukuba siphuma kwezoqoqo lomanyano kazulu lamapholisa — community policing, sizaqala ukubonisana ngabadingwa ngamanye amapholisa akuleli. Lokhu sikwenza sinanzelela ukuba isikhathi sekhefu sinzima kabi koyabe ebe lomnyama wabanjwa esephula umthetho ngendlela engamenza ayevalelwa! Ngakho-ke, sikhuthazana ukuthi sigcine imithetho yonke yelizwe njalo sivikele ukudalwa kwamacala. Khuthazani abanye bonke lapho eliyabe likhona ukuba bagcine imilayo yesizwe.
Sithe-ke siqalisele ngaseSiabuwa okungesinye sezigaba ezidumileyo zaseBinga. Sidume ngokungcelana lomfula uZambezi lapho okutholakala khona inhlanzi ezinengi lezifuyo ezithengekayo, okungeyinye yenotho yezakhamizi zakulowomango. Bakhona-ke ababe lomnyama okwenza amacala acine “esembula ezabo angena!” Okwamanje, esithole bedingwa ngamapholisa bangu-20 njalo amagama abo lamacala abawetheswayo ami kanje:
– uCosmas Zulu owayehlala emzini wakhe eLusulu odingelwa icala lokugola inhlanzi zaseSiabuwa kanye lelokuzingela, konke lokhu wakwenza ngokungekho emthethweni;
– uKhalani Dube owayehlala emzini kaNever Dube esigabeni sakoChisale eNagangala. Wetheswa icala lokutshaya omunye umuntu kabuhlungu;
– uZondiwe Dube owakoMirrias Mupande esigabeni sakoKhumbu eSiabuwa wetheswa icala lokuhlukuluza umkakhe;
– uPeace Katiyo owacina ukubonakala esahlala emzini kaPassmore Katiyo ngaphansi kukaNduna Chareya koMutoko. UPeace wetheswa icala lokubulala omunye umuntu eladalelwa khona eSiabuwa engakanyamalali;
– uGilbert Ngoro ongumhambuma waseSiabuwa kodwa engaqondakali kahle ukuba uhlala ngaphi kumbe udabukaphi. UGilbert laye wetheswa icala lokubulala okubikwa walidala eloPeace anduba batshaye utshani;
– uEnos Simaamba owabalekela umuzi wakhe eChilimba, Siakobvu esetheswa icala lokudlova kanye lokuthumba owesifazane;
– Omunye njalo nguJoseph Mhlanga owacina ukubonakala esahlala emzini wakhe esigabeni sakoNkidi eLusulu odingelwa icala lokuzingela inyamazana zaseSiabuwa ngokungekho emthethweni;
– uLuckson Muzingeli owatshiya umuzi wakhe eZizemba eSiabuwa ebalekela imilandu emithathu owokuthuka omunye umuntu, ukumlimazela impahla yakhe lokudlova owesifazane;
– uNoak Nkiwane ongomunye wemihambuma yaseSiabuwa owetheswa icala lokuya emacansini lomntwana ongaphansi kweminyaka engu-16 ubudala;
– uZivai Masiakuwi owayehlala ku-Plot 9 esigabeni sakoMasuku eKadoma anduba abalekele icala lokweba isifuyo alidalela eSiabuwa.
– uGilbert Mugale owabaleka emzini wakhe eKalonga esetheswa umlandu wokutshaya omunye umuntu;
– uIsaac Munkuli olomuzi wakhe eKalungwizi kodwa kubikwa ngemva kokwetheswa icala lokuphazamisa ukuthethwa kwelinye njalo icala elalisetheswa omunye umuntu, wadla phansi;
– uTrust Ndlovu isakhamuzi sakoMakondo esetheswa icala lokutshaya omunye umuntu;
– uProsper Gwaya owacina ukubonakala esahlala ku 811 estaladeni uNyaradza eGokwe. Wetheswa icala lokweba alidalela eSiabuwa;
– uSimbarashe Sibanda ongumtshayeli owayehlala ku-A173 eNumber 2, edolobheni leHwange owabalekela icala lokuthwala abantu ngemota yempahla engalungelanga ukugadwa ngabantu;
– uMike Kokera owetheswa icala lokutshayela imota butshapha ngesikhathi esedlula eSiabuwa. Wacina ukubonakala esahlala ku-239 kwesinye sezitalada zaseGokwe uNyaradza;
– uSentence Ncube owayehlala emzini wakhe esigabeni sakoNsambala. Wetheswa icala lokutshaya omunye umuntu kabuhlungu, lo
– Painoti Zandu isakhamuzi saseChilimba eKariba esabalekela icala lokweba alidalela eSiabuwa.
Izihlobo labangane laba badingwa yiZimbabwe Republic Police (ZRP) Siabuwa. Obaziyo kumbe ongahlangana labo, kabazise ukuba kabaphange bayozigeza emapholiseni aseduzane labo ngoba phela besesemsulwa elihlweni lomthetho. Amacala la basawetheswa kuphela ngakho kuhle ukuba bayozikhulula baphile njengabo bonke abanye abantu. Siyabonga, sidibane kwelizayo.
Thumelani imibono yenu kunombolo yeWhatsApp u — 0783185092 kumbe ebulenjini ku — [email protected] / [email protected] / [email protected]
