uMthunywa
YiNtatheli kaMthunywa
ABADLALI beqembu leHighlanders sebeveze ukuthi bafuna kuphendukiswe uCosmas Zulu esikhundleni sokuqeqetsha iqembu elikhulu.
Iphephandaba likazulu lixoxisane labadlali abambalwa ngemva kokulolonga kwabo ngoLwesibili emini kwavela ukuthi balusizi ngokuswela uZulu.
Abadlali laba bathe kumidlalo edluleyo lapho abanqotshwe khona badlale imizimba ibuhlungu ngokudinwa, okuyikho okwenza bakholwe ukuthi iqembu “libotshwe” ngemithi ethile.
Lokhu kuza kulandela ukubika kukaErol “Mkabayi” Akbay ukuba ufuna ukusebenza loCosmas Zulu ekuqeqetsheni iqembu leHighlanders.
Abadlali bathe nxa uZulu engekho, kuzakubanzima ukuthi bathole ukunqoba. Kusukela ekupheleni kukaNtulikazi, iBosso yanqoba kanye kumidlalo eyisithupha.
“Lathi sifuna uTsano aphenduke. Nguye esimzwisisayo,” kubika omunye wabadlali beHighlanders okhethe ukuba yisikhulumi sabanye.
“Besingela nkinga sisebenza loTsano. Umqeqetshi uAkbay uqinisile nxa esithi uAmin [Soma-Phiri] ubebulala iqembu. Isicelo sethu ngesokuthi abadala bethimu baphendukise uTsano. Iqembu ngelethu sonke, akula phakathi kwethu ofuna ukuthi sihlale sinqotshwa.”
USoma-Phiri obengumsekeli kamqeqetshi ukhalale umsebenzi ngemva kokuzwa ukuba uAkbay uveze ukuthi uyamphambanisa, nanko labadlali bathe abamfuni.
Inkokheli zeBosso ngoLwesibili zibize umhlangano lentatheli zemidlalo zabika ukuba angeke zibuyelise uZulu esikhundleni.
Umaqhuzu wethimu uNhlanhla Bahlangene Dube uthe isizatho salokhu yikuthi njengeqembu ‘elihlelekileyo’ balandela isinqumo esaphawulwa liqula elathi uZulu kakhitshwe eqenjini elikhulu.
“Angeke kwenze ukuthi sibuyelise uZulu esikhundleni sakhe ngoba silandela lokho okwakhitshwa yi-disciplinary committee. IHighlanders liqembu elilandela imthetho yokwenza izinto ngakho sizagxila kulokho.”
UDube uthe abakhathazeke ngakho khathesi yikuthi iqembu linqobe.
“Umqeqetshi sesimnike umbiko wokuthi azame ukunqoba. Abadlali silabo, akumelanga akhale ngokuthi asilabo abadlali. Abagadli bagcwele angabasebenzisa, pho kuyini okungasehlula?”
IBosso idibana leqembu leChapungu ngeSonto enkundleni yeWhite City.
