uMthunywa
Tina Fletcher Masendu Dube
Dumilani makamu angu, banhutana nebahhuhha nabomme nemhandala. Mungayibo boMhihha boNsungwaha bakasungwa bakasununguka naboNdambeli bakawha guwo bakandila mbeli. Tohla imwi boThobela beni bevula.
Bamuka tjini bana nebana bebana bobaGonde naboBaNibuso ndisingakangan’we bogogole boBaNkodza?
Matjisuka mitjili kene basekulu Ntombo, zwikeyi ke makabehha? Iko ndingazwidziyidza nekwemitjili nezwikeyi iwo matenje akatemwa kene gole ileli saku banhu bakabhuda luphalalephade befupatila mizi benovima iyo yaObama neyaMboweni kuti kutengwe kafu.
Mahhuba akapinda ndakayiwha ititima akumbula yeliyagole ndilikanyi, nagogu lubaka ndake ndawhila nehaka n’ombe dzisingabon’we. Ndakamuka ndisumhasumha nezwitolo ndilinga mbewu, andizotongobona nesakana tjin’ompela tjose. Kene yakapedziwa nebalimi banasi. Banambewu dzakasala makenyi ngatitjidzeni bo bamwe makamu angu, kwagala maboko anongulana.
Bamwe ndebasina matula nezwidlo zwabakawana bakadla zwati zokona pela bakatengesa bekon’wa nayiko siya ngululwane yepa whuku. Ngatitjidzaneni baKalanga bakanyi kwedu tibhatsane kusiti unatjitje ati ndetjitje yega ngaakobelebo bamwe. Ne unan’ombe ngapebo bamwe mazopo kana tose atingapfuwe, n’hayi kobeyani?
Nebasanhu bakatema matenje kene iyo minda kana bamwe banhu banodla mutolo beti yelima abatoyingina.
Ndomukumbila makamu angu ngatilibilidzeni tisisiyiwe nelubaka. Kwagala kutiwa mbizi kuti n’hingo utjimbidze pela kakale ube nlelu. Banaminda dzisingalimwe pani basinaminda kudze balime kutakwe hhala muntunhu webuKalanga tisizibgwe tilibanhu banofa nehhala makole wose.
Tjibgwe tjolemela bakule bapedlo betamba natjo, nowana guswi lisihoma kuyi iminda dzakanhomwe, awubhuzwisisa bonhomwe bakhona abatapano, baku UK bamwe bakuHarare bamwe begala kaBulawayo kene kuTitji. Abatjahha bewolima, bamwe banhu bagele kanyi haya ntunhu wotunhubula bakalima. Ngono minda yakabigigwani isingapiwe banhu bangadzilima bakatjidza tjaba tjaMwali. Kuyi dzinabeni kubviwa banhu basingazibe kuti bhadza loposela mavu kunagupi luboko akulimwa, iko kuti jogwe losiwa pasi kene pehhugwi kontshibha wen’ombe adzisungwa.
Bose bamuhango ayindeni kanyi gole leli tinolima kudze bana bedu bazibe tjinhu tjinoyi hhihha kana makole apinda kwakusitjina hhihha ngobe kusingatjalimiwe. Ngatihanganeni mahhuba anotobela apa Ndzimu ebvuma kana tjakalisa uNdzimu. Imi ndinzekulu wakaTjabe kaDzandiwa n’anga kaTjikwala mizi ikapalala, tate balinzekulu wakaTapa kaNkodza bobaNtapa ntalawunda n’ombe inohaba bana bedombo gulu bomangula nenkaka betivula inanyubgwila. Imi natate tilibokumbudzi boMvelase basingalale nontshwayilo mun’umba banopa Ndzimu nenhewa mapfunde alihhele dula, bakatjulika Malikwe gulihhele vula naShashe gutjilukoba, dzakedzilihhoba nasi dzabe njizi totuna nabalumasitu batema basingadle bhudzi linobaba basingabhate keneni tjina masitu. Ndinkololo waMbobe kaMasendu.
