uMthunywa
Abanye abantu basuka bakhangelele phansi abaculi bezokholo baqakathekise abanye abaculi. Kule iviki iphephandaba likazulu lijonge ukuqeda inkethabetshabi kwezokuthokozisa uzulu nanku phela lize lengadlangadla yomculi wezokholo ongena kuvungame uzulu wonke.
Umculi lo nguKnowledge Nkiwane indoda edabuka eNkayi ecula okwedlula ingilosi ngokwayo. Othanda ukujabula kule iviki nansi ingxoxo emnandi phakathi komculi lo uKnowledge Nkiwane (KN) lentatheli yephephandaba likazulu uCornelius Luphahla (CL).
CL: Jahalakithi akutsho ngamafitshane mayelana lembali yakho kanye leyomculo wakho?
KN: Mina ngazalwa ngo1981 esibhedlela seMpilo koBulawayo ngakhulela esigabeni seDlawa eNkayi. Ngangena uGiredi 1 eDlawa Primary School ngo1987 ngaze ngayaqeda uGiredi 7 kulesisikolo ngo1993. Ngemva kwalokho kangizange ngaqhubekela phambili ngezifundo zami ngenxa yokuswela imali. Ngemva kwalokho ngahlala ekhaya kwathi ngo2003 ngaqala ukuhlabela leqembu leGospel Impact ngapha ngingumalayitsha ngaze ngayakuma ngo2006.
Noma nje ngaqala ukuhlabela ngo2003 kodwa ngesikhathi ngisafunda ngangihlabela kakhulu ngaze ngacina sengihlabela kumaqembu omculo wesicathamiya noma nje ayengadumanga.
Ngaqhubeka ngokucula kwathi ngo2007 ngasebenza ukutshayela amagonyethi ngaze ngayatshiya ngo2015.
Ngalesisikhathi ngangingamanga ukucula. Kwathi ngo2012 ngaqala elami iqembu ngalibiza ngokuthi Knowledge Nkiwane noma nje ngangingamanga ukucula kuGospel Impact.
CL: Njengomculi wodumo sowakhipha amadlalade amangaki mfokaNkiwane njalo abantu bathini ngomculo wakho?
KN: Mina njengoba ngicula kumaqembu amabili kuGospel Impact sesakhipha amadlalade amathathu leDVD eyodwa.Mina ngedwa sengakhipha amadlalade amabili leDVD eyodwa. Idlalade lakuqala ngalikhipha ngo2012 lithi Ujesu Uyazi, kulandele elika2015 elithi Umlilo kaJehova. Ngo2016 yikho engikhiphe khona i-DVD ledlalade lami lika2015 kanye lelengoma ethi UJesu Uyazi ekudlalade lika2012.
Ngalokhu abantu bayawujabulela kakhulu umculo wami, bangikhuthaza ukuthi ngiqhubekele phambili ngibaculele ngoba ngiyabajabuluisa kakhulu.
CL: Tshela uzulu ukuthi ingoma zakho wandise ukuzitshayela ngaphi njalo ukhangelele ukwenzelani abalandeli bakho lonyaka?
KN: Ingoma zami ngivame ukuzitshayela emikhosini etshiyeneyo efana lama-shows, emidlalweni, enkonzweni kanye lezitaladeni kungakhathalekile ukuthi kukweleSouth Africa kumbe kwelakithi koMthwakazi.
Lonyaka ngikhangelele ukuvakatshela endaweni ezehlukeneyo ngizwisa uzulu ingoma zami. Okunye njalo ngizavakatshela lemaphandleni ngisenza ama-shows ukuze abantu bazibonele ngamehlo umsebenzi engiwenzayo kwezomculo.
CL: Ngaphandle kokucula chazela uzulu ukuthi msebenzi bani owenzayo Nkiwane?
KN: Mina kulezinsuku kangisebenzi ngiphila ngokucula kuphela njalo esikhathini esinengi ngivame ukuculela kweleSouth Africa ngoba yikho okulamankampani amanengi athengisa umculo.
CL: Lokhe waqala ukucula bunzima bani oyake uhlangane labo njalo nkuthazo bani oyipha abaculi abasacathula jahelibanzi?
KN: Ubunzima engiyake ngihlangane labo ekuculeni yikuswela imali yokuzithuthukisa kanye lokuswela indawo yokuthengisela umculo wami ikakhulu kwelakithi eZimbabwe. Ngalokhu kubaculi abasasungula ngithi kababambelele emculweni bengadeli noma kunzima. Okunye njalo ngithi kasibambane ukuze senelise ukusungula amankampani akhangela ngezomculo wethu koMthwakazi.
