uMthunywa
Silo Mehleli Dube
KWATHI uTholakele ehlukuluziwe emacansini kwahleka ababesebenza laye, lalapho efika enkambeni ebika isiga ayehlangane laso lamapholisa athandabuza baqala ukuthaphana ngamehlo agcwele insolo lokungakholwa ngoba bebona indlela ayegqoke ngayo.
Wayevunule isigcebhezana lesikipha esasitshiya inkaba iphandle kwaze kwakhanya lecici elalifakwe enkabeni lenwele ezisesiswini zikhanya zisiya ngezansi kwenkaba.
Umpholisa owosapho luka Eva okwakumele amzwele ngoba laye kungamehlela noma nini, wathi akayilande eyiqala phansi indaba yakhe, waqala ukuhluba indlubu ekhasini ethi usuke lomngane wakhe besiya emtshadweni bafika badla banatha, kanti kulomunye ubaba owayesethathekile ngesimo sikaTholakele wathi uzamphelekezela ngemota yakhe nxa umtshado uphela ethi ngoba ilokitshi lapho ahlala khona kwakulezihlobo zakhe ayefuna ukuyazibona.
Laye wavuma ukuthi uzaphelekezelwa ngulubaba owayengaba yintanga kayise. Ubaba lo waqala ukubathengela amanamunede ngoba umtshado wawuseduze leyinye ikilabhu lapho okwakuthengiswa khona ugologo.
Wayethi uTholakele lomngane wakhe bangasukuma besiyagida kumbe besiya endlini encane asale esithi qwayi ugologo wohlobo lweJack Daniels afake lamanzi aqandayo ngitsho ama ice cubes.
Nxa bebuza ukuthi nhloboni yenamunede athi ngenye evela emazweni banatha yaqala ukubabamba ingqondo, Tholakele wabona umhlaba ungani uyabhoda ukuthi ame kwehlula wayeselokhu esiwa lubaba wamthwala wamfaka emoteni lalapho abantu bebona emthwele esiwa emoteni kakho ngitsho loyedwa owacabangela into embi.
Abantu bakuthatha njengokuthi nguyise usehambisa intombazane yakhe endlini.
Lubaba wasuka wahamba laye ewofisini lakhe wamenza konke ayekufuna wamdlwengula ugologo waze waphela ekhanda, wavuka emdambiyana njalo engagqokanga lutho njalo lebhulugwe lakhe langasese lidabukile njalo lapho ayelele khona kwakungela ngubo, wahle wayifunda ivaliwe ukuthi kukhulu okwenzakele ebusuku.
Inhlahla yamaswazi abalayo lubaba wawisa isithupha sakhe isikhathi betshukumisana uTholakele engafuni ukukhipha impahla, uthe esephuma wasidobha waqonda laso emapholiseni, kodwa abaze bamkholwa kwaze kwaphumisela omunye umpholisa wathi kambe umuntu engekela ukubhinywa wena uhamba unqunu yini elifaka amadoda ezilingweni, imilenze yomuntu owesifazana iyafihlwa ayivezwa egcekeni njengenkanyezi ekhanyela emanzini.
Banengi odade abazithola besesimeni sika Tholakele ngenxa yokuthi uyabe esengumuntu omdadlana balutshwani abakholwa ukuthi uyabe edlwenguliwe, ngaphandle nxa kulusane lubanjwe iganyavu ngumuntu omdala.
Isixwayiso sami sithi abadlwenguli badlwengula noma ngubani ikakhulu ngezikhathi zekhefu leKhisimusi siboqaphela singahambi emidlalweni labantu esingabaqondisisi kahle.
Ayixabene.
Umlobi ungamthinta ku: 0714355641.
