uMthunywa
Cornelius Luphahla
IZAKHAMIZI zezigabeni ezigoqela iMafa, Somgolo leMlonyeni zikhala sililo sinye sokungaphumeleli kwabantwabazo ezifundweni ngenxa yokuswelakala kwesikolo se-Secondary kule indawo okudala ukuthi abantwana bahambe umango omude besiya esikolo.
Kubikwa abantwana laba bahamba amakhilomitha angaba ngu-20 besiya esikolo seZwangendaba okudala ukuthi inengi labo lingenzi kuhle ezifundweni zabo kuthi abanye basuka bazithwale besafunda ngenxa yokuswelakala kwe-secondary school eduzane.
UMthunywa uxhumane lesinye isakhamuzi sakule indawo uMnumzana Henry Bigboy Moyo ochaze ukuthi balutshwana abantwana abaphumelelayo ezifundweni kule indawo ngenxa yomango.
“Inengi labantwana balapha abaphumeleli ezifundweni ngoba bahamba umango omude besiya esikolo okudala ukuthi bafike sebediniwe bengaselasifiso sokufunda,” kutsho uMnu Moyo.
Uqhubekele phambili njalo walandisa ukuba abanye abantwana bacina besekela ukufunda ngenxa yalokhu.
“Ngikhuluma nje abanye abantwana balapha kabafundi ngenxa yobude bomango. Abanye abantwana bayazithwala ngenxa yokuba basuka balambe endleleni baphethe bekhomba ukuze amajaha lawo abathengele ukudla. Lokhu kudala ukuthi bazithwale bengazimiselanga ngapho lamajaha akhona engabathathi,” kuveza uMnu Moyo.
UNkosazana Beliter Ndlovu omunye wezakhamizi zakule indawo uchaze ukuthi bona njengezakhamizi bazimisele ukuzakhela isikolo kule indawo.
“Thina njengezakhamizi sizimisele ukuzakhela isikolo kule indawo noma nje sizadinga uncedo kuHulumende lakwezinye inhlanganiso kodwa siyabe sizamile lathi. Uhlupho esilalo nje yikuthi iForestry Commission kungathi iyasivalela ukuthi sakhe isikolo kule indawo,” kutsho uNkszn Ndlovu.
Ekhuluma loMthunywa uKhansila wakule indawo uMnumzana Steven Mganyulwa Ngwenya uchaze ukuthi bakhangelele ukwakha isikolo kule indawo lonyaka.
“Thina njengabazali sikhangelele ukwakha isikolo eMafa lonyaka ngoba sesiqalile amalungiselelo aso. Ngakho isicelo sethu yikuthi ngabe uHulumende uyangenela kanye lenhlanganiso ezizimele zodwa ukuze senelise ukwakha isikolo lesi ngokuphangisa,” kuveza uMnu Ngwenya.
UGeneral Manager weForestry Commission uMnumzana Armstrong Tembo uchaze ukuthi bona bayakuvumela ukwakhiwa kwesikolo kule indawo.
“Thina njengenhlanganiso yeForestry Commission kasali ukuthi izakhamizi zakhe isikolo ngoba lathi abantwana bezisebenzi zethu bafunda khatshana ngakho kungakhiwa isikolo lapha labo bengaphumula,” kuveza uMnu Tembo.
UMsekeli kaMqondisi wezemfundo esabelweni seMatabeleland North uMnumzana Jabulani Mpofu ebuzwa ngale indaba uvumile ukuthi abantwana bakulezizigaba bahamba umango omude kakhulu besiya esikolo.
“Kuliqiniso sibili ukuthi abantwana bakulezizigaba bahamba umango omude kakhulu besiya esikolo seZwangendaba njalo lokhu kwenza umntwana engenzi kuhle ezifundweni, ngakho isikolo siyafuneka lapha. Nxa abazali befuna ukwakha isikolo kasibaleli ngoba bayabe bethuthukisa ezemfundo,” kuphetha uMnu Mpofu.
