uMthunywa
MTHWAKAZI omuhle! Siyalibonga bakwethu kuhambo lwethu lwalonyaka silwisana lokudalwa kwamacala njengamapholisa eZimbabwe Republic Police (ZRP). Sinanzelela ukuba lima lathi sikhathi sonke, ebunzimeni lasebuhlungwini ngakho silifisela iKhisimusi enhle — lina abomanyano kazulu lamapholisa kunye lomphakathi wonke jikelele.
Ngizaqala ngokulethulela izixwayiso zogatsha lweZRP olwezasemgwaqweni. Ugatsha lolu ngolweZRP National Traffic njalo luqhuba imikhankaso yokwalana lengozi zasemgwaqweni. Umsebenzi lo luwuqhuba lomanyano walo owabunjwa zinhlanganiso ezigoqela iTraffic Safety Council of Zimbabwe, Zinara lezinye eziphatheka kwezasemgwaqweni. Indikimba yemikhankaso le, ethi ‘‘Say No To Road Accidents,’’, ngesiNgisi, isikhuthaza sonke ukuba silandele imithetho lemilayo yezasemgwaqweni ukuze senqabele ingozi. Lokhu kumunyethwe yisixwayiso sabo sakuqala esithi, “Adhere to road rules and regulations.”
Ezinye njalo izixwayiso ezande ukusiphathisa ukuphungula izingozi zasemgwaqweni ngezilandelayo:
Emigwaqweni, abahamba ngenyawo kabaqume endaweni ezifaneleyo hatshi ndawana zonke nje ngoba kulezi izinsuku zeziphithiphithi, inani lezimota lisuke liqanse kulalelo esilijayeleyo. Izimota lezihambi ezisebenzisa imigwaqo le zisuke zitshiyane lezensukwini ngoba abantu begcwele indawana zonke lalapho abangakaze bahambele khona. Inguquko le engaba yingozi phakathi kwethu, inqotshwa ngokulandela imilayo yemigwaqweni ngoba yona kayiguquki.
Chaphani imigwaqo le ngonanzelelo. Akukhathalekile ukuba uchaphele lapho okufanele khona kumbe hatshi.
Omunye umtshayeli ulakho ukungakunanzi lokho acine ekugxoba ngephutha kumbe ngengozi. Singaqinisi amalungelo okuba lapho engihamba kumbe engimi khona kulilungelo lami! Kudingakala ukuba siphathisane emgwaqweni lapha bakwethu. Umphambukele ophambanisayo uma ukubona ukuba ukwenza njalo yikho okungavikela ingozi kumbe ukusiza umphefumulo. Phela inhloso yokutshumayela ngendingeko yonanzelelo emgwaqweni iza ngoba sisazi sonke ukuthi ingozi lezi ziyabulala!
Ebusuku, abahamba ngenyawo kabembathe impahla ezicazimulayo kumbe ezimhlophe ezilakho ukubonwa ngumtshayeli esesekhatshana. Lokhu kufana lazo izimota okumele zibe lama-reflectors angezelela izibane ezilazo. Phela zikhona izimota “ezibona ngelihlo linye,” zona zimele zibe lamabili. Amapholisa athi kasoze alale ekhipha izimota ezinjalo emigwaqweni ngoba zingalungelanga ukuyisebenzisa — ziyingozi zona ngokwazo!
Ngizalubambela lapha udaba lwezasemgwaqweni, ngiyalinxusa bakwethu ukuba liphathisane lawo wonke amapholisa eliwafica emigwaqweni kunye labo bonke abaphathisana lawo ukulawula imithetho yezasemigwaqweni.
Uma lingaba lemibono kumbe izikhalazo, thintani inombolo ezilandelayo kumbe ukuya ehofisini yamapholisa aseduzane lani:-
– Police General HQ 24 hours: 04-700171/7
– ZRP Complaints Desk 24 hours: 04-703631
– National Traffic HQ 04–799269/0773400999/0712883312
– Officer Commanding (OC) Southern Region 0772655090.
Bakwethu siphila ngomusa kaNkulunkulu sisidla izithukuthuku zethu. Pho-ke ukuthathelwa umphefumulo lokutshontshelwa impahla yakho kunzima ngoba lokhu kakuzi lula emuntwini. Ubunzima busekubeni mazi uNkulunkulu lokumkhonza kunye lokuphila ngokusebenza gadalala ukuze uvune. Izigebenga lamasela kabakunanzi konke lokho. Yikho okwenza impi yomanyano kazulu lamapholisa itshise bhe nxa izingela izigilamkhuba; iba sengani idliswe i-mustard kanti-ke hatshi; ijonge ukuletha ukuthula phakathi komphakathi ngokulwisana lokudalwa kwamacala. Icala engilingenisa lapha bakwethu ngelokugqekezwa kwezindlu lezakhiwo zethu yizigilamkhuba zihlose okuhlukahlukeneyo.
Sinanzelela ukuba izigangi zigqekeza ngoba zijonge ukweba, ukudlova, ukubulala, umona nje owokuhlukuluza umnini wesakhiwo kumbe okunye okunjalo. Icala leli laziwa ngelikaUnlawful Entry ngokomthetho weCriminal Law (Codification and Reform) Act, Chapter 9:23. Okwenziwa ngumagqekeza esephakathi kwesakhiwo kulicala elizimela lodwa ngoba phela angithi akusomasela wodwa agqekezayo. Izigebenga eziyabe zihlose ukudlova zibanjwa ngamacala amabili elokugqekeza lelokubamba iganyavu. Ngokunjalo qaphelani bakwethu ngoba kwesinye isikhathi izikliwi lezi ezigqekezayo, ziyabe zihlome ngemihlobo yonke yezikhali. Zicina zibulala, zidlwengula kumbe zidala amanye amacala.
Kasivikeleni icala lokugqekeza lingakadalwa. Esingakwenza yikuthela ukhethe emaceleni ezindlu zethu ukuze izigilamkhuba zingafika siphange sizizwe. Valani iminyango lamafasitela, lihluthulele izindlu zenu lokufaka ama-burglar bar kunye lama- alarm / amaCCTV lokunye okunjalo. Lingalali obukabhuka. Uma lisethekela kwezinye indawo tshiyani omunye umuntu ngekhaya kumbe lazise amapholisa aseduzane lani alikhangelele indlu yenu kuhlelo lweZ.R.P House Under Supervision scheme.
Thumelani imibono yenu kunombolo yeWhatsApp u – 0783185092 kumbe ebulenjini ku – [email protected]/ [email protected]/ [email protected]
