uMthunywa
Siphathokuhle Ngulube
Salibonani bafundi. Ngithemba ababhalayo liqhuba kuhle kakhulu kumihloliso yenu. Siyaqhubeka sikhumbuzana ngezindlela zokuziphatha ngesikhathi sibhala imihloliso. Likhumbule phela bafundi ukuthi imihloliso le eliyibhalayo ibuya kanye ngomnyaka.
Nxa ungenzanga kuhle lonyaka kutsho ukuba uzalinda kuze kube ngumnyaka ozayo. Ngalokho-ke bafundi kuqakathekile ukuba siziphathe kuhle ngesikhathi lesi ukuze kungabi ngitsho lokukodwa okuzasiphazamisa emihlolisweni yenu.
Imihloliso lokhe iqalisileyo kunanzelelwe ukuba bakhona abafundi abaqeda ukubhala imihloliso ekuseni kodwa baze bayefika ngekhaya selingene kunina. Kuvelile ukuba abafundi laba baphuma emihlolisweni yekuseni babhodabhode ezitaladeni kumbe kuvakatshelwe abangane cala celeni. Ekufikeni ngekhaya umuntu ufika engokhatheleyo angathi utshone esikolo esitsho esithi mfe. Pho ke umfundi owenza kanje ulilungiselela nini iphepha elilandelayo.
Yikuziqila phela lokhu mfundi. Okunye njalo osekunanzelelwe yikuthi abafundi babona angathi balesikhathi esinengi kakhulu okwenza banxusane emdlalweni ethile ngempelaviki. Kuzagidwa ke kuze kuphume ilanga. Alungiselelwa nini ke amaphepha angoMvulo? Umfundi uvuka nje ethintitha iphetshana lokungena emihlolisweni kumnyama tshu.
Bafundi umhloliso uyalungiselelwa. Impelaviki kasiyisebenziseni ukuchwayisisa kabanzi ngezinto esazifundayo phakathi kwesikhathi. Isikhathi semihloliso vele ayisiso semidlalo bafundi. Ngesokuthi umuntu ahlale azinze alungiselele iphepha elilandelayo. Ezikolo ezinengi ababalisi bagijimisane kakhulu lamantombazana izikolo zivulwa. Abanye babuye belegusu emakhanda. Bathi bebuzwa bathi bona bakhaphile ngekhefu ngakho angeke bagele.
Kube nzima ke ababalisi labafundi laba baba ligundwane lomangoye okwenza abafundi bafunde nzima. Kambe bafundi okuqakathekileyo umtshado kadadewenu ozawukhapha ngoMpalakazi lemihloliso yakho etsho ukuthi impilo yakho izakubanjani yikuphi? Kufanele sifunde ukuhluza izinto eziqakathekileyo ezimpilweni zethu.
Okunye njalo abanye benu basuka bantshintshe ubuyibo babo nxa sebebhala imbangela kuyikuthi bona sebehamba abasancengi muntu. Isintu sithi tshiya kwakhiwe ngoba awazi ukuthi kunjani phambili. Uzavuka ubadinga ababalisi laba. Ikhona eminye imisebenzi edinga ukuba ube lencwadi ebhalwa yisikolo sakho itsho ukuba ubungumuntu onjani. Kambe bazakubhalelani abababalisi?.
Okunye njalo okuqakathekileyo yikungavumi ukuntshintshwa ngabanye abantwana. Zimele wedwa uzicabangele wedwa ngoba impilo ngeyakho wedwa. Abanye basuka bathathwe ludumo nje baguquke izimpilo ngenxa yabangane abathi nxa sekubhalwa bazibone sebengcono empilweni njalo sebesazi ngcono. Ngalokho-ke liyaxwayiswa bafundi ukuba lingabi ngomzenzi kakhalelwa selehlulekile ezifundweni ngenxa yokuguquka kwezimilo ngesikhathi semihloliso.
Ngilifisela inhlanhla emihlolisweni yenu. Asihlanganeni futhi ngeviki ezayo.
