uMthunywa
YiNtatheli kaMthunywa
AKUBIZWA ozwayo kusukela ngeviki ezayo kumqhugelwano wenguqu kunkezo yeNgwebu lapho okuzangqikilana intshantshu zezikolo zemfundo yePrimary.
Izikolo ezine eziphuma kuzabelo zeMatabeleland North, iBulawayo leMatabeleland South zizalwisa ukuthwala inkezo le ebiza umvuzo wemali.
Imidlalo izaqala esabelweni seMatabeleland South, eKezi ngeviki ezayo.
Inkampani yeNgwebu ikhiphe imali engange $39 000 kuqhutshwa umncintiswano lo.
Phezu kwalokhu, inkampani yeNgwebu ibika ukuba kuzadlala lamathimu amankazana ezikolo, okulinyathelo elaqalisa ngomnyaka odluleyo.
Kwakungaze kubonakale kulinkezo ukuthi kudlale amankazana kumncintiswano weNgwebu. Zinengi izikolo eseziqina ngokuqeqetsha amankazana kunguqu.
Ukubusa kwezikolo zemadolobheni kunkezo le kukhanya sekwaphela nanko phela izikolo zemaphandleni zizimisele ukuthi inkezo le ibe ngeyazo.
Lonyaka umncintiswano weNgwebu uguqukile ngoba kwenziwa isinqumo sokuthi izikolo zonke zigqoke ama-boots.
Kuminyaka edluleyo, inkezo le ibilemthetho elula ekuthini amanye amathimu ayelabadlali abalikhaba ngenyawo.
Inengi lezikolo zemaphandleni beziswela impahla eyeneleyo okuyikho obekusenza zibhuqwe ngezisemadolobheni.
Inhlanganiso yabaphathi bezikolo ze-Primary iNational Association of Primary Heads (Naph), ibika ukuba iyasuthiseka ngosizo lweNgwebu.
Abahlawuleli benkezo bazaphathisa izikolo ngama-boots la kanye lama-kit kusigaba sama-final.
Umphathi omkhulu esabelweni seMatabeleland North, uCharles Ndiweni ubike ukuba ukutholakala kwama-boots kwenze izikolo zaphakamisa isisindo somdlalo wazo ezigabeni.
“Bekunzima ukuthi izikolo zemaphandleni zidlale ngokupheleleyo nxa zidibana lezemadolobheni. Abafana bebesesaba ukuhlanganela lalowo ogqoke ama-boots. Sakunanzelela lokhu, sabona kufanele ukuthi izikolo zonke zifane. Umncintiswano lo usuhlukene kulalokho ebesikubona kuminyaka edluleyo. Akuselathimu eyesaba enye khathesi.”
UNdiweni ubike ukuba inkundla zeJotsholo sezilungele ukwamukela amathimu lababukeli.
“Isabelo seMat North sizakwamukela amathimu wonke. Amathimu kumele asekelwe ukuze abantwana batshengisele ithalenta labo.
“Ngibona angathi inkezo izasala eMat North. Siyasuthiseka ngemidlalo ebesiyibona kulindawo.
Njengoba kuzadibana intshantshu, kutsho ukuba sizabukela ama-final ahlabusayo. Sibonga inkampani yeNgwebu lokusebenza kweNaph ekuthini kuphakanyiswe ithalenta lenguqu kwabasakhulayo,” kutsho uNdiweni.
Inkezo yeNgwebu yiyo egqiba imincintiswano yezenguqu kuzikolo kumhlubulo ongezansi yelizwe kulithemu.
