uMthunywa
Buhlebenkosi Gaule
IZIKOLO zeMatabeleland South zilungiselela umkhosi wokunikeza izicoco kuzikolo ezilabafundi abaphumelele ezifundweni kanye lasemidlalweni etshiyeneyo.
Umkhosi lo uzenziwa esikolo seStanmore Secondary eGwanda lapho okuyabe kukhangelwe impumela zabafundi zanyakenye.
Intatheli kaMthunywa ixoxe loDistrict Education Officer weMatabeleland South, uMnumzana Absai Rupanga ochaze ukuba umkhosi lo wenziwa minyaka yonke.
Uthe lumkhosi ngowokuphakamisa izikolo kanye lokunanzelela izikolo ezaphuma labafundi abanengi abenza kuhle kumihloliso yabo.
“Umkhosi lo siwubiza ngokuthi District Merit Award njalo ubakhona minyaka yonke lapho esiyabe sitshayela abafundi ihlombe ngokwenza kuhle kuzifundo zabo,” kutsho uMnu Rupanga.
“Kuyabe njalo kunconywa abafundi abenza kuhle kumidlalo etshiyeneyo ezikolo zabo egoqela ukugijima, ukudlala ibhola lenyawo elezandla, abakwazi ukuhlabela lokunye nje okutshiyeneyo,” kutsho uMnu Rupanga.
Uqhubekele phambili wathi lonyaka amalungiselelo eDistrict Merit Award aphethwe yiWestern Cluster lokhu kusitsho ukuba kulezikolo ezinhlanu eziphatheke kumalungiselelo kugoqela iNyandeni Primary leNyandeni Secondary, iStanmore Primary leStanmore Secondary kanye lesikolo seLumene Primary School.
“Nxa sisiba lemikhosi le siyabe sifuna ukukhuthaza abafundi ukuba basebenze nzima ezifundweni zabo ngoba lokhu kulakho ukubanika isicoco sama-Merit Awards phezu kwalokhu kubanike ikusasa enhle,” kutsho uMnu Rapanga.
UMnu Rapanga uphethe ngokukhuthaza abafundi abalamathalenta atshiyeneyo okungagoqela imidlalo kumbe zonke ezinye inhlelo ezenziwa ezikolo ukuthi bazimisele ngoba lazo zilakho ukwenza umuntu athole ukuziphilisa.
