uMthunywa
YiNtatheli kaMthunywa
IZIKOLO zemfundo ye-Primary koBulawayo, eMatabeleland North laseMatabeleland South zingena esitikini kusasa langoLwesihlanu kumncintiswano wokugijima oweNestle Healthy Kids.
Lokhe kwangena inkampani yeNestle sekuvumbuluke ithalenta elimangalisayo ikakhulu ebantwaneni bezikolo zemaphandleni.
Inhlanganiso yabaphathi bezikolo ze-Primary iNational Primary Heads, iNaph, ibambene lenkampani yeNestle iqoqa umncintiswano lo minyaka yonke ngethemu yokuqala.
Lonyaka amathimu ezabelo zonke azaqhubekela phambili adibane edolobheni leBindura ngenyanga ezayo.
Amathimu ezikolo kuziqinti zeMat North Binga, Nkayi, Tsholotsho, Umguza, Hwange, Lupane leBubi azadibana kumcimbi wezokugijima esikolo seLoziba Primary eNyathi ngenyanga elandelayo.
Umgcinisihlalo weNaph koBulawayo uNjabulo Bango uthe lonyaka bayathaba ngoba abantwana bazagijima eWhite City.
“Okusijabulisayo yikuthi sivunyelwe ukusebenzisa iWhite City. Abantwana abagijimayo kanye lalabo abazabukela bazakholisa ngobucwazicwazi benkundla yeWhite City.
“IWhite City phela isifana lenkundla lezo esizibona emazweni aphucukileyo. Nxa abantwabethu sebegijimela endaweni enje, akulanto engasehlula ukuthi siphumelele kumincintiswano emikhulu,” kutsho uBango.
Umgcinisihlalo weNaph esabelweni seMatabeleland North uCharles Ndiweni uthe okwakhathesi iziqinti zonke ziphathekile ngokulungisisa okuthile kumathimu azo.
Isigaba seNyathi siyaqala ukubuthanisa izikolo kumncintiswano omkhulu njengalo osekelwa yinkampani yeNestle.
Lonyaka kubikwa umdlalo weze-Physical Education ogoqela le-gymnastics uzabe ukhona.
“Iziqinti zethu zonke ziyadibana esikolo seLoziba eNyathi. Sikhangelele ukuthi amathimu wonke kuziqinti eziyisikhombisa atheleke eNyathi mhlaka 10 Mbimbitho ukuze senelise ukuqala umncintiswano mhlaka 11 kusiya ku-13 Mbimbitho.
“Umdlalo we-gymnastics ophuma kuzifundo ze-Physical Education uzancitiswa njalo ngabantwana abangaphansi kweminyaka engu-11 yokuzalwa.”
UNdiweni ubonge kakhulu ukuphathisa kohlelo lwe-Nestle Healthy Kids ngoba usuguqule indlela izikolo eziphatha ngayo umdlalo wokugijima.
Uthe abantwana abanengi sebevuleke amehlo ngokuqakathekisa ithalenta lokugijima kanye lokukhuthalela ezempilakahle.
“Inhloso yalumncintiswano ngeyokuthi abantwana bavuselele amathalenta abo, ayiwo azabaphilisa kwelakusasa. Nxa begijima bencintisana kanje kubumba ubudlelwano obuhle labanye abantwana bakwezinye izikolo.
Imidlalo yokugijima izaphathisa njalo ukuthi bafunde ukugcina imzimba yabo,” kutsho uNdiweni, owaziwa kabanzi ngobukhokheli bakhe kwezemidlalo kuzikolo zeMat North.
