uMthunywa
Charity Moyo
KULENDODA yeBvumbura eMberengwa ezibophele kwabozala sokuthiwa ilobole umkayo okwesibili ngoLwesine ngeviki edluleyo.
Kuzwakale ukuthi uEmmias Moyo (26), ukhethe ukuzibulala ngesikhathi etshelwa ukuthi lapho athethe khona akusikho ngakibo kamkakhe uLilian Nyoni, 21, kodwa ukhule esondliwa lapho nje kungakho-ke bekuthiwa sokumele alobole umkakhe okwesibili.
Umfakazi obikele uMthunywa ngalindaba uMnumzana Cephas Ndlovu uveze ukuthi uMoyo wathatha ngenyanga ephelileyo, ngesiko wabizelwa konke ayemele akukhuphe. Kuthe indaba zamalobolo sezedlule wabizwa njalo esetshelwa ukuthi lokho ayekukhuphile ngokwesondlo kuphela kumele ayelobola ngakibo kamfazi.
“Indaba le yamangalisa abantu abanengi ngoba ngemva kokukhipha amalobolo uMoyo wabizwa ukuze aziswe ukuthi amalobolo ayewakhiphile ngawesondlo kumele akhiphe amanye aye kubaba womntwana.
“Kwaba buhlungu ngoba laye wayengasebenzi elotsholelwe, ngakho wazama ukubonisa omalume bomkakhe bala ukumzwisa okuyikho okwadala ukuthi azibophele,” kulandisa uMnu Ndlovu.
UMthunywa uxhumane lemuli yakoGideon Siziba eyiyo eyondla umkaMoyo ngoba engumzukulu walapha ekhaya.
Kuvele ukuthi indaba le iliqiniso kodwa abemuli le bebekhathazekile ngoba bethi babengacabangeli ukuthi isehlakalo lesi singacina ngesidumbu phansi.
Umalume kaNyoni uMnumzana Takavada Siziba uveze ukuthi bona lokhu bakwenza ngoba befuna inkomo zabo zesondlo ngoba babesazi ukuthi bengekela ukwenze njalo ubaba womntwana wayengasoze ebaphe lutho.
“Sizizwa silecala elikhulu ngalokhu okwenzakeleyo, thina sasijonge ukuthatha isondlo kuphela ngoba umkhwenyana wethu wayengalobolanga njalo umntwana lo wayewondliwe yithi.
“Sasingazi ukuthi ngokwenzenje sizabangela ukuthi umkhwenyana athathe impilo yakhe ngokuzibophela, siyaxolisa kumuli kamkhwenyana ngokwenzakalayo,” kutsho uSiziba.
Intatheli yenelisile njalo ukuxhumana lemuli yakoMoyo yona eveze ukuthi ithukuthele kakhulu ngokulahlekelwa ngumntwana wakubo.
UNkosikazi Trinity Moyo ozala umuyi uveze ukuthi yena ngesikhathi kusenzakala konke lokhu wayengekho eseGoli lapho asebenza khona. Uqhubekele phambili esithi umntanakhe ubengasebenzi kodwa yena njengomzali wathi esizwa ukuthi umntwana usefuna ukuyavela wathumela imali, phezu kwalokhu wakhipha inkomo ezine ukuze ziyelobola.
“Umntanami wangazisa ukuthi usefuna ukuyavela ngamthumezela imali yokumphathisa kumsebenzi lo phezu kwalokhu ngakhipha inkomo ezine zamalobolo ngoba ngangifuna umalukazana, kwababuhlungu kakhulu lamanje kubuhlungu kimi ngoba bengingakukhangelelanga lokhu.
“Kambe umuntu wake walotsholwa kabili yini? Okwesondlo babemele bekhulumisane bona bodwa,” kulandisa uNkksz Moyo.
Uqhubekele phambili wathi imuli yakoSiziba kumele ixolise ngoba ulahlekelwe ngumntanakhe ngenxa yabo.
UMthunywa uxoxe losobhuku wesigaba uMnumzana Siyafa Ndlovu yena oveze ukuthi kube ludaba olutshaqisa umzimba kakhulu ngoba isehlakalo lesi kasijwayelekanga. Uveze ukuthi udaba lolu luvele ngemva kokuzibulala kukaMoyo ngoba bebengalwazi.
“Imuli yakoSiziba yenza into engakaze yenziwe esigabeni sethu, babemele bebize isondlo ebazalini bomntwana kodwa kubuhlungu kithi sonke nje ukuthi uMoyo uthethe impilo yakhe ngenxa yalokhu,” kuphetha usobhuku.
