uMthunywa
YiNtatheli kaMthunywa
KULEZIGELEKEQE ezihlomileyo eziyisithupha ezihlasele kwenye inkampani etshintsha imali, eAccess Bureau De Change koBulawayo ngoLwesithathu ekuseni zabaleka lemali yakwamanye amazwe okungakatholakali ukuthi yimalini.
Izigelekeqe lezi kubikwa ziphinde zatshontsha imota yohlobo lweHonda Fit yenye inkampani yabonogada.
Isiphithiphithi lesi senzakale kusanda nje ukudlula ihola lika 8 ekuseni eAccess Bureau De Change eseParkade Centre kuFife Street kunye lo9th Avenue.
Abafakazi bancwebe uMthunywa indlebe ukuba abayisithupha laba bebehamba ngemota yohlobo lweHonda Fit engelama-number plates bafike baqonda onogada akade beme e-bureau de change abathathu babo basebengena phakathi besiyatshontsha imali.
Kubikwa balaye wonke umuntu obelapho ukuthi alale phansi andubana badliwe ngumswenya lemali yakwamanye amazwe okungakatholakali ukuthi yimalini.
Ukuhlaselwa kwezigebenga zihlomile kulandela ezinye njalo izehlakalo ezimbili ezenzakale kuviki ephelileyo lapho okuhlaselwe amagalaji amabili koBulawayo, zabopha izisebenzi izandla andubana zibaleke lemali.