uMthunywa
Ethel Ncube
UGATSHA olubona ngempilakahle yezifuyo olweVeterinary Services Department solukhuthaze abalimi abafuyileyo ukuthi inkomo zabo kumele zihlale zidibha ngesikhathi ukuze zihlale zivikelekile.
UMthunywa uxhumane lodokotela wezifuyo eMatebeleland South uDokotela Joel Dube oveze ukuba abafuyileyo kumele badibhise inkomo zabo maviki onke.
UMthunywa uxhumane loDokotela Joel Dube oveze ukuba inkomo zicina zihlangana lobunzima obutshiyeneyo nxa zingadibhiswanga.
ukudibhisa
“Inkomo nxa zingatholi ukudibhiswa okwaneleyo ziyanamathelwa yimikhaza zicine zivaleka imbele amathole engasenelisi ukumunya kuhle.
Enye inkomo izala ithole imbele ivele seyaqedwa du yimikhaza ingasaphumi lutho ithole licine lisifa kungakho ngithanda ukukhuthaza abafuyileyo ukuthi babone ukuba inkomo zabo ziyadibha kokuphela zingabi lemikhaza,” kubika uDkt Dube.
Uqhubekele phambili eveza ukuthi nxa idibha elidibhisa umuntu wonke lingatholakali kumqoka ukuthi umlimi alungise elakhe.
“Emadibheni emakhaya uyezwa kuthiwa akulamuthi inkomo zihlale zingadibhanga. Abafuyi ababambane bakhe elabo idibha ngemakhaya bahlanganise imali yokuthenga imithi ukuze inkomo zabo zivikeleke emikhazeni,” kuphetha uDkt Dube.
