uMthunywa
BAFUNDI, siyahlangana njalo kuleliviki. Ngiyathemba lenze kuhle kumihloliso yenu njalo likhumbulile okunye ebesixoxa ngakho kusukela umnyaka uqala uze uyephela.
Kumihloliso elizabhekana layo kuviki ezayo kaPaper 2 kumaphepha womabili olimi ngitsho olweSiNdebele kanye lelesiKhiwa, kuNgxenye yakuqala (Section A) ilemiklomelo engu-20. Lapha zindaba zokuzibumbela njalo uyabe uphiwe izihloko. Kuphepha lesiLungu kulezihloko ezimbili kodwa esiNdebeleni zinhlanu.
Mfundi kumele ubale uzwisise imibuzo yonke andubana ukhethe isihloko osithandayo kodwa-ke uqaphele mfundi ngoba kumele ube lemicijo eminengi ozayibhala kulesosihloko. Engikutshoyo lapha yikuthi ukuthanda isihloko nje kuphela akuphelelanga kodwa kumele ubelemicijo eminengi ngalesosihloko ukuze uthole imiklomelo eminengi phela. Okunye omele ukuqaphele yikusebenzisa izikhathi ezifaneleyo (tenses), ulimi oluqondileyo, imitsho egcweleyo, inkulumo ezifanele izihloko kanye lempawu zokubhala ezifaneleyo futhi. Kuhle njalo ukuthi umsebenzi wakho mfundi ubukeke lakulowo othwebulayo.
KusiNdebele mfundi ulakho ukuphendula umbuzo wenkondlo, ingxoxo, isaga, indaba yokuzibumbela kumbe incwadi.
KuNgxenye yesibili (Section B)
Kungxenye yesibili kuyafana isiNdebele kanye lesiLungu ngoba kulendaba yokuzwisisa elemiklomelo elitshumi.
Okuqakathekileyo kule ingxenye yikuthi ufunde indaba oyibalayo kathathu ukuze uyizwisise andubana uphendule imibuzo. Bala uzwisise imibuzo ubusubuyela futhi kundaba yakho yokuzwisisa ukuze wenelise ukuphendula.
Phendula ngemitsho egcweleyo lolimi oluqondileyo njalo kube lempawu ezifaneleyo. Kule ingxenye kumele uphe ingcazelo zamabala njengokusetshenziswa kwawo kundaba oyiphiweyo.
Nanku umsebenzi wethu wokuqala
Ngumuntu onjani okuthiwa
1 Yisicubi
2 Liqhalaqhala
3 Yintandane
4 Yisihwaba
5 Yisidlova
6 Yisipatsha
7 Yintandokazi
8 Yingwevu
Nanku umsebenzi wesibili wakuleliviki.
Ibizo eliqondileyo lesipunu lukhezo. Lapha ke
a Isitulo
b Isepa
c Ibhuku
d Ipeni
e Iwindi
f Isotsha
g Umpikitsha
h Amafulawuzi
i Ihafu
j Isitolo
k Ujaji
l Igedi
m Ijele
n Ikhitshi
o Ilayithi
