uMthunywa
Philisani Moyo
Siyadibana njalo bafundi ngemva kweKhisimusi. Ngilethemba lokuba sikholisile bafundi sihlangene lezihlobo labangane. Sesimelele umnyaka omutsha lapho okwakuthi lapho uqhamuka phakathi kwamabili kuzwakale imisindo eminengi abantu bejabulela ukungena emnyakeni omutsha bengabaphilayo.
Lina-ke bafundi landise ukudubula ama-fire crackers uthole sekungumsebenzi izinja zikhonkothe zize zihawule. Ama-fire crackers bafundi noma liwathanda nje ayingozi kithi kanti futhi lomsindo wawo kawulungelanga indlebe zethu. Ngiyalikhuthaza bafundi ukuba siwaxwayeni.
Kusifundo sethu lamuhla sizagxila kusihloko esithi “Isikhathi sosuku”. Usuku bafundi lulezikhathi ezitshiyeneyo kusiya ngokuthi ilanga limi ngaphi. Nanzi-ke izikhathi zosuku ngokulandelana kwazo: ekuseni, emini, emini yantambama, ntambama, ebusuku, phakathi kobusuku, sekuzakusa.
Akesikhangele ezinye izikhathi ngokugcweleyo.
Ekuseni: lapha ilanga liyabe liphuma noma lisanda kuphuma. Nxa liphuma abantu bajayele ukuthi lisithi catsha.
Emini: ilanga liyabe selikhwelile. Abantu emini bathi selisenkanda zabantu. Lapha-ke kuyabe kutshiwo ngoba ilanga liyabe seliqondane lenkanda zabantu.
Emini yantambama: Lapha ilanga liyabe lingasatshisi kakhulu ngakho babethi selithambeme.
Ntambama: Ilanga liyabe selitshona noma lisanda kutshona. Nxa selizatshona kwakuthiwe selibekezela ikumbe selingomtsha wendoda noma selibantu bahle.
Ebusuku: Ilanga liyabe selitshonile sekumnyama kuthiwa sekuhlwile. Ukuhlwa yibunyama.
Phakathi kobusuku: Lapha kuphakathi kwamabili kusitsho ukuthi kuphakathi kwamalanga amabili.
Sekuzakusa: Kuyabe sekuzaba sekuseni. Sekuzadabuka ukusa — esithi emadabukakusa/ emathathakusa/ empondozankomo. Kuthiwa empondozankomo nje ngoba ungaphuma phandle sekuzakusa ukhangele esibayeni senkomo kuyabe kukhanya impondo zenkomo bafundi.
Lizananzelela-ke ukuba izikhathi ezinengi engiziqambileyo zimayelana lelanga. Lokhu kungoba kudala inkombalanga ingakabikhona okhokho babebona isikhathi ngelanga. Lingaphuma babesibakwazi ukuba kwesekusekuseni, lingakhwela liyephezulu enkanda zabantu babesithi sekusemini.
Kasiwulindeleni umnyaka omutsha bafundi kuthi phakathi kwamabili lapho uqhamuka seqe sijanquke ngoba kuyinto enhle njalo kuyisipho esivela kuMdali ukungena komunye umnyaka singabaphilayo. Kasihlanganeni njalo ngo-2016 bafundi.
