uMthunywa
SIYADIBANA njalo kule iviki bafundi ngithemba lidlale kuhle ikhefu lokukhumbula amaqhawe alwela ukuthi ilizwe lethu likhululwe ezandleni zabamhlophe.
Kule iviki sizajulisa-ke ingqondo zethu ngolimi lwethu oluhlabusayo, kungakho-ke asiziqhenyeni ngalo.
1) Uyabe enjani umuntu nxa kuthiwa:
a) yinsumbelume — ngumuntu wesilisa osefanele ukuthi ngabe sewathatha kodwa elokhu engakathathi.
b) Ngumfelokazi — ngumfazi owafelwa yindoda.
c) Yisigwadi — ngumuntu wesilisa ongakhonjwayo.
d) Yingalane — ngumuntu olomzimba omkhulu kodwa imbala imncane.
e) Umfelwa — yindoda efelwe ngumfazi.
f) Umjendevu — yintombi engakhonjiswayo.
2) Emitshweni elandelayo bhala igama elilodwa elitsho into efanayo.
a) Lamuhla sizakudla umumbu owaphekwa wachaywa. — Ufutho.
b) Lungisani umumbu, amazambane, inyawuthi lokunye ngoba sekusondele ukulima. — Inhlanyelo.
c) Uthanda ukufaka amazambane acholiweyo esitshebeni. — Idobi.
d) Imbuzi ube eyikhunge ngomchilo owenziwe ngengxoza. — Igoda.
e) Lapha okufiwe khona kuzwakala ngabantu bekhala. — Ngesililo.
f) Umuntu lo uhamba ehlala lapha lalapha. — Ngumhambuma.
g) Wena uthanda ukukhuluma njalo. — Uyalawula.
h) Umama uzayifaka amathikili okuqala kusasa indlu entsha. — Ijumo.
i) Inkomokazi yami yehlisile, isize ikhupha uchago ingakasengwa. — Isizisenga.
j) Asidle nansi inyama ephekwe izolo. — Isikhupha.
k) Amaxhegu athanda ukudla amathumbu amancane. — Amalulu.
l) Landa into yami engigcinela kuyo igwayi lamakhala. — Imfuko.
m) Ngithengise inkomo engehlisiyo. — Isigqala.
n) Ungithengisele umntwana wembuzi. — Izinyane.
o) Basiphe inyama yenkomo ezifeleyo. — Ingcuba.
p) Simnandi isitshwala samabele akhitshwe emgodini. — Somncantsha.
q) Ngihlangane lomuntu oloboya umzimba wonke. — Ihwanqa.
r) Bahlabe inkomo ephiwa unina wentombi enkomeni zamalobolo. — Inkomo yohlanga.
