uMthunywa
Imihloliso kaGrade 7
KULE iviki ngicabange ukuthi sike sikhangele incwadi ebuya ngaphansi kwezigaba zendaba njengoba nje kuviki edluleyo sikhangele omunye umhlobo wencwadi, yokudinga umsebenzi. Kule iviki sizake sigxile ekubhaleni incwadi yobungane.
Sizakhangela-ke ngokubhalwa kwencwadi yobungane esiyibiza ngesilungu sisithi yi-friendly letter. Okwakuqala nxa uthe wakhetha incwadi kumele unanzelele ukuthi yi-friendly letter kumbe yi-business letter. Okwalamuhla sizathatha le eyobungane. Uqala ngokuloba ikheli lakho ngokugcweleyo. Isibonelo:
Lotshe Primary School
P.O. Box 90
Gweru
21 Mabasa 2016
Lapha nanzelela ukuthi kawufaki ungqe, ukopi ngoba lokhu kungenza ukuthi ulahlekelwe yimiklomelo njalo nanzelela ukuthi amabala kumbe ibizo libhalwe ngokugcweleyo. Nxa uthe wenza lokhu kuzamele weqe umzila ubusubhala ilanga, inyanga lomnyaka. Nxa usukwenzile lokhu kuzamele weqe njalo umzila ubusubhala-ke ukuthi incwadi yakho iya kubani, ungenza lokhu uyeqa njalo umzila ubusuqala-ke ukubhala indaba yakho.
Nxa usuthe wayibhala ungakhohlwa ukuthi lapho okulamabizo abantu, awenyamazana kumbe izindawo aqala ngebala elikhulu. Okunye okuqakathekileyo yikuthi ungaqumi amabala njalo ekucineni komutsho kumele kube longqe.
Nxa ukhethe incwadi umzimba wencwadi kumele ube ngamabala alikhulu lamatshumi amabili (120) okutsho ukuthi ikheli asiyibali.
Ungakhohlwa ukuthi okunye ukubingelela kungabuya esigabeni sokucina usubhale konke okuqakathekileyo okuphathelene lencwadi. Nxa ubhala izindaba okuqakathekileyo yikulandela isihloko, ukubhala ngolimi olunonileyo kumbe oluvundileyo njalo usebenzise izitsho lezaga ngendlela eqondileyo.
Okokucina kumele ungakhohlwa ukuvalelisa ubhale ibizo lakho. Nxa kuyi-friendly letter awufaki isibongo sakho.
Yikho okuqakathekileyo okumele ukwenze.
Lisale bafundi sizahlangana ngeviki elizayo.
