uMthunywa
Mthokozisi Dube
INHLANGANISO ebona ngezenguqu kuleli iZimbabwe Football Association (Zifa) isibike ukuba incoma usekelo eluthola kubalandeli benguqu ikakhulu ngesikhathi kusenziwa imizamo yokuvuselela inguqu yakuleli.
Isikhulumi sale inhlanganiso uXolisani Gwesela ubike ukuba kusadingeka ukuthi abalandeli, uHulumende kanye labasekeli benguqu bahlanganise imibono ukuze kuthuthukiswe inguqu yakuleli.
Inkuthazo kaGwesela iza kulandela ukuba usomabhizimusi weHarare uWicknell Chivhayo ekhalale ukunceda iqembu leli ngoba intatheli zibhala kubi ngenguqu yakuleli ngesikhathi ezama ukuncedisa ngokubhadala umqeqetshi wamaWarriors uCalisto Pasuwa.
“NjengeZifa siyalwamukela usekelo lukaChivhayo njalo amasango avulekile kulabo abafuna ukusiza inhlanganiso le,” kuveza uGwesela.
UGwesela ubike ukuba inhlanganiso yeZifa yaziwa iyinhlaganiso esebenzelana kuhle labezindaba njalo labo abezindaba kumele basebenze bekhululekile ikakhulu nxa bebhala indaba eziqinisekileyo hatshi ezingabangela ukuthi inhlanganiso iswele usekelo.
“Intatheli sisebenza lazo kuhle njalo sikhangelele ukuthi ubudlelwano lobu buqhubekele phambili ukuze inguqu yakuleli ithuthuke. Ngingathi inguqu yakuleli ayingeke isukume kungela abezindaba kodwa inhlanganiso yeZifa igcina imfihlo yomqhatshi lesisebenzi,” kubika uGwesela.
UGwesela ubike ukuba ukukhombana ngeminwe akungeke kuthuthukise inguqu yakuleli kulandela imibiko yokuthengiswa kwemidlalo.
“Isicelo seZifa yikuthi sibeni ndawonye njengemuli yenguqu, sinike uChiyangwa lequla lakhe isikhathi sokuvuselela umdlalo kuleli,” kubika uGwesela.
Okwamanje iqembu lamaWarriors lihlezi kungalane yelogu kuGroup L njalo likhangelele ukuyaphatheka kumqhugelwano wesithathu wenkezo yeAfrican Cup of Nations ozakuba khona eGabon ngomnyaka ozayo.
