uMthunywa
Innocent Kurira
INHLANGANISO ephethe umdlalo wenguqu kumhlubulo ongezansi yelizwe yeZifa Southern Region isihlele umhlaka 24 kuMbimbitho njengosuku lomhlangano walo womnyaka.
Umhlangano lo kubikwa uzaphatha okusegudwini okubalisela ukwethulwa kombiko kamgcinisihlalo lokuhlaziya ingwalo lesikhwama semali.
Kodwa okuzakuba mqoka yingxoxo mayelana ngokudingwa kosekelo lwemali yokuqhuba imidlalo yeligi le, nanko phela nyakenye kudlalwe kungela mali.
Isizini ka-Division One edluleyo ibilamagingqigongqo, kulamaqembu thile ayehluleke ukudlala ekhala ngokuswela imali. Amanye amaqembu axotshwa kuligi ngesizatho leli. Amaqembu la abalisela iZimbabwe Saints, Mountain Climbers kunye le-Emakhandeni Pirates.
Olunye udaba oluzavela ngelokuthi iBulawayo City iphinde ingene njalo kuligi. Abaphathi beCity balboa incwadi kunkokheli zeZifa Southern Region bedinga indawo yokuncintisa kuligi lonyaka.
I-Zifa yona ithe isinqumo lesi sizathathwa ngumhlangano weCongress kuphela.
ICity yakhitshwa kuligi ephezulu ngo-2022 kodwa yehla kakhulu yadlala ku-Division Two. Iqembu leli lenza lokhu ngemva kokuthatha isinqumo sokuthi liqine ngokulolonga abadlali abasakhulayo.
Iqembu leli selilolonga abadlali asebefunwa ngamaqembu aphezulu uMpumelelo Bhebhe ohamba okuChicken Inn lo-Elshaamar Farasi obekuHighlanders.
ICity, ezibiza ngokuthi ngaMakhosi Amahle yangena kuligi yePremiership ngo-2016. Yaphosa yaxotshwa kuligi le ngo-2017. Kodwa-ke, ngomnyaka olandelayo kwehlula yacina isiphumile. Iphindele ngokuphangisa kuPSL kulandela ukunqoba iligi yeZifa Southern Region Division One ngomnyaka ka2019.
