uMthunywa
Thokozile Mbedzi
ZlLOKHE zinkemile izakhamizi zesigabeni seMabikeni endaweni yamabhizimusi eGoredema eGokwe ngaphansi kwenduna uChireya ngemva kokuba amadoda amabili ebulele enye ngempelaviki beyethesa ubuthakathi.
Kubikwa uCollen Javu lo Francis Sibanda babenatha utshwala eGoredema lapho abaqala khona ukwethesa umzawabo uPondai Manyawi, oleminyaka engu-53 yokuzalwa, icala lobuthakathi.
Ekhuluma lentatheli kaMthunywa uMnumzana Stephen Mpofu uthe izelamani lezi ezingabasolwa zenza into eyisihluku.
“Silokhe sisatshwaqe imizimba silapha. Izemalami lezi zenze isihluku esesabekayo endaweni yamabhizimusi ngesikhathi sizinathela utshwala.
“Ababili laba bahle basukela umzawabo uPondai bethi uyabaloya, asazi kumbe lokhu kwakubangelwa butshwala kumbe vele babeke bakudingisisa lokhu kubosiyazi.
Asizange siyithathele phezulu indaba le ngoba sisithi yikuxoxa nje kwabantu ngezomdeni wabo nje sakuthatha lula sizinathela nje.
“Amadoda lawa ukungazwisisani kwayaphambili sacina sesisizwa amagama amabi izelamani zisithi uPondai nguye obangela imikhuhlane emulini.
“Sisathi sithathisise kuhle udaba lolu uCollen wahle wahlahlela uPondani ekhanda kathathu ngehloka uFrancis Sibanda laye wamkhaba esifubeni lesiswini kanenginengi.
“Ababili laba, uSibanda loJavu, bakwenza ngesiphangi phangi abantu bathi besondela ukuthi balamule uPondani wayeseqalekile kudala izelamani zahle zadliwa ngumswenya. Udaba lolu lwahle lwabikelwa amapholisa,” kulandisa uMnu Mpofu.
U-Inspector Loveness Mangena
Isikhulumi samapholisa esabelweni seMidlands uInspector Emmanuel Mahoko uthe udaba lwamadoda amabili ahlasele umzawabo ngehloka solufikile ehofisini yabo.
“Udaba lwamadoda amabili uCollen Javu loFrancis Sibanda ababenatha eGoredema bacina sebebulele umzawabo ngokumhlahlela ngehloka bethi uyabaloya njalo nguye obangela imikhuhlane engapheliyo emulini lufikile endlebeni zethu.
“Abasolwa laba ngemva kokudala icala leli bahle babaleka batshiya uPondani equlekile esopha kakhulu nanko phela ubelamanxeba atshonayo amathathu okuhlahlelwa ekhanda.
“UPondani uhle wathwalelwa eGokwe District Hospital lapho afike walaliswa khona mhlaka 8 yilapho adluliselwa khona eGweru Provincial Hospital lapho afela khona endleleni engakafiki.
“Amapholisa acela usizo lukazulu ekutholeni abasolwa laba.
“Ongabe elolwazi lwalapha abatshona khona sicela aphangise azise amapholisa aseduzane laye,” kuphetha uInsp Mahoko.
