uMthunywa
Yi Ntatheli kaMthunywa
UKUQHUTSHWA kwemidlalo yamaYouth Games alonyaka esabelweni seMatabeleland North kuvule uHulumende ingqondo ukuba lindawo isemuva kwezengqubekela phambili yemidlalo.
IMat North ayila zakhiwo zokuphatha imidlalo ethile. Lapho okulezakhiwo kusedolobheni leHwange kuphela.
Ukuswelakala kwezakhiwo lokhu kudale ukuba kube lemidlalo encintiselwa koBulawayo, inyathelo elidanise abantu beMat North loba nje bekubonile ukuthi bekungela elinye icebo.
Imidlalo le, ehlelwe kakutsha ngokwengeza inani lemincintiswano kusukela ku-8 kusiya ku-22, ibiza imali enengi.
Isabelo lesi sithathelwe imncintiswano yokubhukutsha lekhilikithi ngemva kokuba kuswelakale inkundla ezifaneleyo zemidlalo le. Enzikini yedolobho leHwange likhona ichibi lokubhukutsha lenkundla yekhilikithi kodwa zonke azikho esimeni esifaneleyo.
Ezinye izigaba zeMat North ezibalisa iLupane, iBubi, iTsholotsho leNkayi ziyadubeka ngokuswela yona inkundla loba isakhiwo esicacayo sokuphatha imncintiswano.
Ukuswelakala kwenkundla lezi kuvalela phandle abantwana abalesiphiwo semidlalo ukuthi bathuthukise amathalenta abo. Inotho yezemidlalo isikholiswa ngabantwana abahlala koBulawayo, eHwange laseFolosi kuphela.
Aluba uHulumende wakhipha imali yokusekela imidlalo le, kungumbono wabanengi ukuthi aluba imidlalo yonke iqhutshelwe kulindawo.
Inkokheli zemidlalo etshiyeneyo eqhutshwa kumaYouth Games la zibikele uMthunywa kuliviki edolobheni leHwange ukuthi sekuyisikhathi sokuba uHulumende aqakathekise ukuthuthukisa ukwakhiwa kwenkundla zemidlalo yonke indawo.
“Nxa sizakuthi siqinisile ngokuphathisa ukuthuthukisa ithalenta labasakhulayo eZimbabwe, uHulumende kumele asekele imidlalo le ngokupheleleyo. Lonyaka bekuyisiqalo sohlelo olutsha, yikho obekumele kuphoselwe imali, kulungisiswe inkundla lokusela isabelo esilomlandu wokuqhuba imidlalo,” kutsho eyinye inkokheli yomdlalo wokugijima eyale ukuqanjwa kuphephandaba.
UKenias Nkomo ongumqeqetshi womdlalo webhola eMat South uthe ngaphandle kokuthi kulungisiswe udaba losekelo lwemali, akulanto engalunga ngamaYouth Games alandelayo.
“Udaba olubuyisela emuva imidlalo le ngolwemali. Singaqambelani amanga ngokuthi kuzalunga sigoqe izandla. Khathesi iMat North ithwele nzima ukutshengisa ukuba iyenelisa ukuphatha imncintiswano. Lezinye izabelo zizakhala ezimathonsi kuminyaka elandelayo nxa isimo singaguqulwanga.”
Ekhuluma kumkhosi wokubusisa ukuqala kwemidlalo, umphathintambo wezemidlalo kuHulumende uMakhosini Hlongwane uthembise ukuthi uzakwenza konke okusemandleni akhe ukuncedisa ukuqhutshwa kwemidlalo ngendlela eqondileyo.
Kusenjalo, loba kukomnyama ubambile ngezemidlalo eMat North, lukhona udaba oluthabisa abathandi bemidlalo kulindawo.
Edolobheni leFolosi labo abatshisekela ukuncintisa ngokubhukutsha lokufundela imidlalo yamanzi bazathola ithuba lelo ngokusebenzisa inkundla yokubhukutsha kulindawo.
Inkundla le iselokitshini leChinotimba njalo kubikwa yakhiwa kulandela ukuqhutshwa komhlangano weUnited Nations World Tourism Organisation (UNWTO).
Umgcinisihlalo weVictoria Falls Legacy Projects Trust uOlga Mutamba uthe leli lithuba elihle kubadlali beFolosi laseMat North yonke jikelele.
“Umphakathi we-Victoria Falls kumele usukumele phezulu usekele uhlelo lolu oluhlose ukuphakamisa ithalenta labantwana bakulindawo abaleziphiwo kumdlalo wokubhukutsha.”
Isabelo seMatabeleland North besingela siziba somdlalo wokubhukutsha okutsho ukuba izikolo zakulesi sabelo, ikakhulu eziseduzane leFolosi zizathathela uhlelo lolu phezulu.
