uMthunywa
Fairness Moyana
IZAKHAMIZI zesigabeni seNemananga Wadi eJambezi sezihlalele evalweni ngenxa yezizalwane zeZambia esezihluphile ngokuzintshontshela izifuyo zazo zihambe lazo kibo.
Lezizakhamizi kubikwa sezalahlekelwa ngamakhulu amanengi enkomo kanye lembuzi zintshontshwa ngabantu beZambia echapha lazo uZambezi encediswa ngezinye izakhamizi zakule indawo okudala ukuthi kubenzima ukubamba amasela la.
UKhansila weNemananga uMnumzana Jabulani Moyo ubikele intatheli ukuthi inkomo esezantshontshwa ngamaZambia la sezizinengi kakhulu njalo bazintshontshela emadlelweni.
“Izigaba esezihlaselwe kakhulu ngamasela la zigoqela iSikumbi, Jabulani,
Siamwende kanye le Secret Heart.
Ngakho-ke inkomo lezi zintshontshwa nxa zisemadlelweni akhatshana aseduze lomfula uZambezi emngceleni weZimbabwe. Okunye okusikhathazayo yikuthi indawo esakhele kuyo iseduze lomngcele yikho besintshontshela kangaka.
Ngikhuluma nje inkomo esesazintshontshelwayo ziyedlula i500,” kutsho uKhansila uMoyo.
UMnu Moyo uqhubekele phambili njalo wachaza ukuthi kukhanya kulezinye izakhamizi zakule indawo ezincedisana lamaZambia la ukuntshontsha inkomo zabo.
“Okusuka kusiphambanise yikuthi ezinye izakhamizi zalapha ziyancedisana lamaZambia ngokubatshela ngomumo osesigabeni njengoba lazo ziyabe zisazi ukuthi sizakwenza nini imihlangano yokukhuluma ngokuntshontshwa kwezifuyo zethu.
Ngakho-ke nxa kulomhlangano lo yikho amasela la asintshontshela khona inkomo zethu njengoba bayabe besazi ukuthi sisemhlanganweni,” kutsho uMnu Moyo.
UMnumzana James Nkomo oyisakhamuzi sakule indawo ubikele intatheli ukuthi ukuphuza ukuna kwezulu lendlala yikho okudale ukuphela kwenkomo kule indawo.
“Ukuphuza ukuna kwezulu lonyaka lendlala yikho okudale ukuthi inkomo zethu zintshotshwe ngoba ziyasuka ziyedlela eceleni komfula uZambezi ngoba kungela yinye indawo elotshani esingadlisa khona izifuyo zethu khona.
Noma nje kulamapholisa alinda kule indawo kodwa kukhanya kuyehlula ngakho kufanele bangezelele amapholisa azalinda kule indawo,” kutsho uMnu Nkomo.
“UKhansila kaWadi 7 eJambezi uMnumzana Binwell Sibanda uchaze ukuthi noma nje kulamapholisa akhangela ngokuntshontshwa kwenkomo kodwa kukhanya kuyabehlula njalo sokuphuzile ukubuya komtshiso endaweni yabo.
“Noma nje sabhalisa imitshiso yokutshisa inkomo zethu ukuze senelise ukuzibona khonale eZambia kodwa lokhu singakatholi izithupha zemitshiso le njalo abalungisisa izithupha lezi bayaphuza ukuzilungisa yikho siphelelwa yizifuyo zethu.
Ngabe sebasilungisela bekuzakuba lula ukuba sizibone khonale eZambia sizithathe. Ngakho-ke khathesi sisakhulumisana labo ukuba basilungisele masinya.
“Khathesi izakhamizi sezaze zabona kungcono ukuthi zeluse inkomo zazo zindawonye ukuze zenelise ukuvikela inkomo zazo emaseleni la,” kutsho uKhansila uSibanda.
Induna yakule indawo uMnumzana Shana uvumile ukuthi indaba le uyayazi wathi sowayibika lemapholiseni.
“Indaba yokuntshontshwa kwenkomo ngamasela eZambia ngiyayazi sengaze ngayibika lemapholiseni ukuthi azosinceda ukuze singaphelelwa zinkomo kumbe athumele abanye abangasincedisa,” kutsho induna uShana.
Imizamo yokukhulumisana loLivestock Officer wesabelweni seMatabeleland North yehlule ngoba ubengekho ehofisini yakhe.
