uMthunywa
IZOGADLA ngabalingisi abatsha intandokazi yomdlalo wakuSABC 1, iSkeem Saam, okuqala isizini yayo entsha ka-12 maduze.
I-Skeem Saam sikhonjiswa njalo ngo-6.30 ebusuku phakathi nesonto.
Owayeyintandokazi yeScandal! kwi-e.tv, uHungani Ndlovu, ungomunye wabalingisi abazojoyina lo mdlalo.
UHungani wayelingisa indawo kaRomeo Medupe kwiScandal! esikhonjiswa ngo-7.30 ebusuku phakathi nesonto.
KwiSkeem Saam uzodlala indawo kaThabo “Tbose” Maputla okuwumlingiswa obuyiswayo. Phambilini le ndawo yayidlalwa nguCornet Mamabolo owashiya ngo-2021 wabonakala nakwiThe River kwi-1Magic ngemuva kwalokho.
NgokweSABC, umdlalo uzobe ugxile ebafaneni ababili abathola igugu eliyingozi elifihliwe elishiya oyedwa wabo esengcupheni nobudlelwano bakhe buntengantenga.
Uzoqala ukubonakala kusuka ngoJulayi 13 kwiSkeem Saam uSisanda Qhubeka ozolingisa indawo kaTazz Ngida “Umndeni wakwaMagongwa nowakwaMaputla ujikijelana ngamazwi alumelayo nezinsolo nokushiya abantu bebuzana ukuthi ngabe bazokwazi yini ukudlula kulokhu kungaboni ngaso linye.”
Kuthiwa esiqeshini sokuqala sesizini ka-12 yilapho uTbose ezobuya khona ngaphansi kwezimo ezingezinhle nokungase kucekele phansi izithandani ezisencane.
I-Skeem Saam sizophinde sethule umlingiswa omusha uSisanda Qhubeka ozodlalwa nguTazz Ngida. USisanda uzobe engowesilisa ozethembayo futhi osebenza emkhakheni wezokumaketha.
“Akuyena wonke umuntu ozomamukela ngezandla ezifudumele njengoba ezoqubula izinkinga ezizoshiya umbuso wakwaMaphosa uhlukene phakathi.” UTazz uzoqala ukubonakala kusuka ngoJulayi 15.
ISABC iphinde yaveza ukuthi isizini entsha ezoqala ngoJulayi 3 izobe yethula nebika elisha lalo mdlalo.
ISkeem Saam senza kahle ngokwezibalo zababukeli njengoba sesiwumdlalo wesibili ngokubukwa kakhulu eNingizimu Afrika ngemuva koZalo okuyindawo eyayiphethwe yiGenerations: The Legacy.
Ngokwezibalo ezishicilelwe kwiBroadcast Research Council of South Africa zangenyanga edlule, iSkeem Saam sinababukeli abangu-4 328 139. Uzalo lunabangu-5 098 865 kanti iGenerations: The Legacy yona inabangu-4 194 921. — Ubulembu
