uMthunywa
YiNtatheli kaMthunywa
UMAQHUZU wenhlanganiso yeHockey Association of Zimbabwe (HAZ), uHumphrey Chigwedere usebike ukuba sebeqoqe imncintiswano eminengi ezadlalelwa enkundleni yeKhumalo koBulawayo kulumnyaka.
Kubikwa imincintiswano le izadibanisa amathimu asacathula kanye lalawo aziwayo kuleli laphuma kwamanye amazwe.
Umbiko kaChigwedere lo uza ngesikhathi inhlanganiso yakhe isebenzelane lezikolo ekuthuthukiseni umdlalo we-hockey.
Ekhuluma loMthunywa kuliviki uChigwedere ubike ukuthi kukhangelelwe ukuba limncintiswano edlula emihlanu.
“Ikhona imincintiswano ezabuya koBulawayo. Sincoma indlela inkundla yeKhumalo egcinwe ngayo ngakho kungumlandu wethu ukuthi siphakamise imidlalo yonke kulindawo.
“Okwakhathesi sizama ukuthi senze umdlalo we-hockey lawo ubesezingeni eliphakemeyo njengeminye imidlalo.
Kudala ilizwe lakithi belisazakala ngomdlalo we-hockey. Ngenxa yomkhonomi welizwe odonsa nzima, inkundla zawo lazo zacina zisifa ngakho lelizwe lakithi kalisenelisi ukubonakala njengamanye amazwe,” kutsho uChigwedere.
Kusenjalo, i-HockeyAssociation of Zimbabwe ibika ukuthi izaqhubekela phambili ikhankasela ukunxusa amazwe njengalokhu eyakwenza kumncintiswano wenkezo yeAfrica Cup of Club Champions (ACCC) owadibanisa amazwe ayisitshiyagalombili ngoNcwabakazi nyakenye.
“Ukuqoqa imincintiswano enjengale kuncede kakhulu amathimu akuleli ngoba abadlali bayabona ubungcitshi babanye abadlali. Phezulu kwalokhu, inkundla zethu ezibalisa iBulawayo Hockey Stadium leMagamba eyeHarare zizasetshenziswa kanengi, okuyikho okumele kwenzakale.
“Inkundla yeKhumalo ingcono kulezinye eZimbabwe njalo isakhanya nxa kuqathaniswa lezinye inkundla elizweni lakithi.”
UChigwedere uqhubeke wathi: “Impahla esetshenziswayo kumdlalo we-hockey iyadula kakhulu. Siyazama sibili ngoba phose ezweni lakithi izabelo eziyisikhombisa ziyenelisa ukudlala i-hockey.
