uMthunywa
Arnold Ndlovu
INHLANGANISO ekhangela ngezokulima iAgritex ikhuthaza abalimi ukuthi balime ikhabitshi ngoba yenza kuhle ngesikhathi somqando.
Ekhuluma lentatheli kaMthunywa, uNkosazana Treggie Mpofu onguHorticulture Specialist esabelweni seMatabeleland uthe isikhathi somqando yiso esilungileyo ekulimeni ikhabitshi.
“Ikhabitshi ilemihlobo eminengi kodwa evame eZimbabwe yilo obizwa ngokuthi yi-drumhead, umlimi engazilimela umhlobo lo wekhabitshi ngoba ulomkambo njalo ungalethela abalimi inzunzo ephezulu.
“Nxa umlimi engalima umhlobo lo wekhabitshi ulakho ukuzifaka emathubeni okuthola inzuzo engaphezulu, inkuthazo esilayo kubalimi yikuthi bekhangelele ukulima isilimo lesi ngasolesi isikhathi ngoba kasihluphi kakhulu ngesikhathi somqando,” kutsho uNkszn Mpofu.
Uqhubekele phambili uNkszn Mpofu wathi ikhabitshi ilomkambo omkhulu ngoba iyisitshebo esithakazelelwa ngabantu.
“Nxa sikhangela ikhabitshi yisilimo esilomkambo ophezulu kakhulu ngoba ithengwa phose ngumuntu wonke oseZimbabwe. Ukuthengwa kwekhabitshi kuqala ebantwini abathenga besenzela isitshebo ezindlini kubuye lasendaweni okuphekwa khona ezifana lamahotela lasemakhefa ikhabitshi ingasetshenziswa ukwenza ama-salads,” kuchaza uNkszn Mpofu.
UNkszn Mpofu uphinde waxwayisa abalimi uNkszn Mpofu ukuthi loba nje isilimo lesi sivuma kakhulu ngesikhathi somqando abalimi bengasilima langasiphi isikhathi somnyaka okuyabe kuqakathekile yikusinakekela.
“Ikhabitshi yona ngokwayo iyavuma ukulinywa loba yisiphi isikhathi somnyaka kodwa okuyabe kudingeka ukuthi umlimi akwenze yikuthi anakelele izilimo zakhe zikhathi zonke, umlimi engasebenzisa indlela ze-irrigation ukwenzela ukuthi ahlale elezilimo umnyaka wonke,” kuphetha uNkszn Mpofu.
