uMthunywa
Cornelius Luphahla
UMDLALO wenguqu uqhubekela phambili emaphandleni akuleli nanku phela leNkayi kukhanya sokulenhlansana zamaqembu enguqu noma nje engakathuthuki.
Amaqembu la asekelwa ngamadoda amabili uJosiah Ndhlovu loPrecious Sibanda abadabuka esiqintini seManomano eNkayi noma nje ngokusebenza besebenzela kweleSouth Africa.
UNdhlovu uchaze ukuthi sebeleminyaka emithathu baqala ukuncedisa amaqembu la.
“Injongo eyenza sasungula umdlalo lo yikuthi sabona ukuthi inengi lentsha yakithi kayisebenzi ngakho kungcono iveze ubungcitshi bayo esigabeni ngomdlalo wenguqu.
“Sileminyaka emithathu siqalile ukuncedisa amaqembu la noma nje aqala emahlanu. Kumnyaka ophelileyo amaqembu la ancintisane engu-11 kodwa lonyaka silamaqembu angu-16.
“Amaqembu la azancintisana kusukela mhlaka 21 Ncwabakazi kusiya ku 23 Ncwabakazi esigabeni seManomano.Iqembu elizanqoba lizaphiwa umvuzo wenkezo,” kutsho uNdhlovu.
UPrecious Sibanda ubike ukuthi bafisa ukuthi basungule amaqembu enguqu azathuthukisa isigaba.
“Isifiso sethu yikuthi sithuthukise isigaba sethu ngenguqu njalo sifuna ukuthi siphethe sesileqembu elikhulu lenguqu elizadlala lamaqembu amakhulu akuleli.
“Ngilethemba lokuthi ethubeni elizayo umdlalo lo uzabe suthuthukile ngoba amaqembu la aya esanda,” kuphetha uSibanda.
