uMthunywa
Ethel Ncube
NGENHLOSO yokulwisa indlala eLupane i-irrigation yeJotsholo engaphansi kweAgriculture Rural Development Authority (Arda) isitshintshe amagiya nanko phela ngaphandle kokungezelela indawo abayilimayo lonyaka ikhangelele ukusebenzisa indlela entsha yokuthelezela izilimo zayo ebizwa ngokuthi yi-centre pivot.
Kubikwa endaweni le bekulinywa amahekitha angu-50 ngomnyaka kodwa lonyaka insimu le iqheliswe yaba ngamahekitha angu-200.
Esinye isisebenzi esikhulume loMthunywa uMnumzana Elias Ndlovu siveze ukuthi intuthuko isikhona ku-irrigation yabo ngoba lendlela yokuthelezela layo siguqukile.
“Kuqala indawo le ibisebenzisa umhlobo we-irrigation owokugelezisa amanzi emfolweni, okwakhathesi njengoba sesiqhelise insimu sesizasebenzisa i-centre pivot ukuthelela ngoba lindlela iyenelisa ukuthelela indawo enkulu hatshi le endala,” kutsho uMnu Ndlovu.
Intatheli ixhumane lesinye isakhamuzi uNkosazana Nomusa Ndlela sakule indawo esichaze ukuthi i-irrigation yeJotsholo isithuthukile nanko phela sebengezelele ngitsho lamahekitha abawalimayo.
“Siyakujabulela lokho okwenziwa yiArda ukuthi sebezalima indawo enkulu ukuze balwisane lendlala njengoba izulu lingani kuhle endaweni yakithi.
“Ngikhuluma nje ucingo solufakiwe lokuhlanyela sebeqalisile njalo lomtshina wokuthelela omutsha usufakiwe,” kutsho uNkszn Ndlela.
UMthunywa uxhumane lomunye wabakhangela indawo le uMnumzana Ndodana Ncube ochaze ukuthi sebelungisile indawo le ukuthi balime.
“Lapha bekulinywa amahekitha angu-50 omumbu kodwa lonyaka siqhelisile, sizalima amahekitha angu-200 njalo sizasebenzisa i-centre pivot ukuthelezela umumbu lo uze uvuthwe.
“Okwakhathesi sesifakile ucingo njalo lokuhlanyela sesiqalisile sikhangelele ukuthi singavuna uthengiswele izakhamizi zakhonapha leGrain Marketing Board,” kuphetha uMnu Ncube.
