uMthunywa
YiNtatheli kaMthunywa
ABADLALI abasakhulayo kumdlalo wethenisi sebekhuthazwe ukuba baphakamise isisindo sobungcitshi babo ukuze benelise ukudlala kumincintiswano yaphezulu.
USibangani Nyoni ongumqeqetshi walumdlalo edolobheni lezimbamgodi ubike ukuba abadlali kumele balangazelele ukudlala labanqobi bomhlaba enkundleni zaphezulu.
Uthe abadlali abasakhulayo balomlandu wokulolonga ebusuku lemini belenhloso yokudlala njengentshantshu, bathole ubungcitshi obungaphezulu.
“Kumdlalo wethenisi njengayo yonke imidlalo kumele umuntu aphakamise ubungcitshi bakhe. Ubungcitshi buyalolwa njengengqamu. Kumele nxa udlala ubebukhali. Ababukeli kumele bakubone ukuthi yibungcitshi bomdlali lo sebuphezulu.
“Abasakhulayo yibo abalesikhathi esihle sokuthi balolonge indlela abatshaya ngayo ibhola, baqinise imizimba yabo.”
Umqeqetshi lo uthe ukhuthaza njalo abadlali bayo yonke imidlalo eHwange ukuthi basebenzise inkundla zemidlalo ezigcwele kulelidolobho kulokuhlalela izandla.
Uthe abatsha abalethalenta lemidlalo balomlandu wokuthi basebenzise inkundla baphakamise impilo zabo.
Phose wonke amalokitshi eHwange alenkundla zemidlalo yonke ekhona kuleli. UNyoni unike umzekeliso wokuthi yena esakhula inkundla lezo zazithunqa uthuli, kudlalwa nsuku zonke.
“Ngiyakhumbula thina sasigcwala inkundla zazinyakazela ngontanga, sikholisa ukudlala. Ukubuthana kwethu kwenza abanye bazibonakalisa ngamathalenta abo.
“Okungehlula abantwabethu ukuthi benze lokhu kuyini? Yikho ngisithi abasakhulayo kuthenisi, ibhola, ukugijima layo yonke imidlalo, abasukume benze okungcono ngempilo zabo bengabadlali,” nguNyoni lo.
Isixwayiso sikaNyoni sibalulekile njalo siphuma kumqeqetshi oyingcitshi ngokwakhe.
“Ngifuna ukubuyisela ukuphumelela kweHwange kwezemidlalo kusimo sakudala. Ngikhumbula iHwange isayesatshwa kwezemidlalo ngakho yiso isifo sami sokuthi iHwange yesatshwe njalo,” kutsho uNyoni.
