uMthunywa
Ethel Ncube
ABALIMI bekopalethivi yeThembanani kuWadi 9 eNyamandlovu babonga ukusekelwa kwabo nguHulumende nanko phela sebetholiswe impahla yokulima osekwenze benelisa ukungezelela indawo abayilimayo.
Iphephandaba likazulu lizwe ukuthi iqembu labalimi laba abalitshumi latholiswa impahla yokulima ebalisa amathalakitha, amakhuba lokunye okuyikho abakusebenzisayo ekulimeni insimu yabo.
Intatheli ixhumane lelinye ilunga labalimi laba uMnumzana Moffat Ndlovu ochaze ukuthi indima yabo yokulima isezingeni eliphezulu.
“Silime amahekitha adlula angu-10 omumbu sisebenzisa ithalakitha ngoba iyenelisa ukulima indawo enkulu ngesikhathi esifitshane.
“Ikanti eminyakeni edlulileyo besilima indawo encinyane ngoba inkomo zethu zingenelisi,” kutsho uMnu Ndlovu.
Uqhubekele phambili echaza ukuthi uhlelo lwabo lokulima luyathuthuka ngenxa yosekelo lolu abalutholayo.
“Ngokuthola kwethu impahla senelisile njalo ukulima i-soya beans amahekitha amabili. Sikhangelele ukuthi singavuna sizithengise ukuze imali yakhona incedise ekuthengeni inhlanyelo ezasebenza kumnyaka olandelayo,” kubika uMnu Ndlovu.
Iphephandaba likazulu likhulumisane loThemba Dewa ochaze ukuthi indlala bazayizwela kwabanye.
“Siyambonga kakhulu uHulumende ngoba kutsho ukuthi lonyaka nxa izulu lingana kuhle inala sizayitshaya sibili ngoba indawo elinywe umumbu inkulu.
“Sibonga uHulumende ngokusekela uhlelo lokutholisa abansundu umhlabathi njalo lokusipha impahla yokulima ngoba ithalakitha isiphathise kakhulu ngoba aluba asilayo besingeke senze lutho.
“Inkomo ziyacuba azenelisi ukusebenza emasimini. Sikhangelele ukuthi ngomnyaka olandelayo siqhelise insimu yethu njalo silime ezinye izilimo ezitshiyeneyo,” kuphetha uMnu Dewa.
