uMthunywa
Ethel Ncube
KULOSAZIWAYO wakoBulawayo ozibiza ngokuthi nguMayihlalela osezakhele udumo ngokuhlekisa umphakathi kunye lokulingisa nanko usekhiphe iziqephu ezingu-500 zomsebenzi wakhe.
UMayihlalela useyintandokazi yabalandeli labathandi benkundla zokuxhumana ezibalisa iFacebook, Twitter le-TikTok. Kumidlalo yakhe uMayihlalela, olebizo lokuzalwa uMthulisi Moyo, ugxile kuzehlakalo zempilo ahlangana lazo lalezo ezisemlonyeni yabantu.
Eminye imidlalo yakhe isibonakala kusigxingimazwi kumagagasi eZBC.
Ubike ukuba wakhulela esiqintini sakoSigola lapho afunda waqala ukuba lothando kwezokulingisa. Uthe wakhuthazwa ngabanye abafundi lababalisi ukuthi aqhubekele phambili kumidlalo yokulingisa lokunandisa emcimbini etshiyeneyo.
Intatheli kaMthunywa ixhumane loMayihlalela oveze ukuba laye uyamangala ngobukhulu bomsebenzi wakhe.
“Umsebenzi wokulingisa ngawuqala ngimncane. Ngisakhula ngavele ngakwazi ukuthi ngizakwenza lokhu impilo yami yonke. Okwamanje ngikhuluma ngomsebenzi wami wemidlalo osuleziqephu ezingu-500,” kutsho uMayihlalela.
uFreddy Gwala
“Imidlalo yami ikhuluma ngezehlakalo zempilo ezitshiyeneyo, okunye ngokwenzakala kimi kuthi okunye ngengikubonayo njengomuntu ophila labantu.”
Uthe kuminyaka yakhe esebenzela ukuthokozisa uzulu, usesebenze labosaziwayo abanengi asebephakamise ibizo lakhe, bamenza wahlonipheka.
“Lokhe ngaqala ukwenza imidlalo yami sengisebenze labahlabeleli abadumileyo abeMzansi Afrika ababalisa uFreddy Gwala.
“Ukulingisa lokhu angikwenzeli imali kuphela kodwa kulubizo kimi. Ngikwenza ngoba ngikuthanda ukulingisa njalo ngemisebenzi yami ibizo lami liyakhula kakhulu ngoba abantu beyibona imisebenzi yami.
“Ekulingiseni lapha ngithanda ukukhuthaza abasacathula ukuba bengenzi lokhu bekhangelele imali, kodwa abasebenzele ukuthi bakhulise imisebenzi yabo.”
