uMthunywa
Nkosilathi Sibanda
ABAQEQETSHI beqembu likanobhutshuzwayo iFC Platinum bayabobotheka ngokudlala komdlali omutsha kulithimu uIshmael Wadi owathengwa esuka kuqembu leBulawayo Chiefs ngoMpalakazi odluleyo.
UWadi ungene kuqembu lezimbamgodi leli elabanye abadlali beBulawayo Chiefs uWallace Magalane loLast Sithole.
Ekhuluma lephephandaba likazulu ngoLwesibili, umqeqetshi omkhulu weFC Platinum uNorman Mapeza ubabaze kakhulu umdlalo kaWadi wathi nguye umdlali obeswelakala kuqembu lakhe.
“Amalungiselelo ethu aqhuba kakuhle ngoba abadlali laba esibathole kuBulawayo Chiefs kukhanya bayazi abakwenzayo. Kungabe kukhona abanye abazozama inhlanhla kodwa kuzakuba nzima ukuthi bayedlule ithalenta likaWadi.
“Abalandeli beligi yethu (PSL) bazavumelana lami ukuthi iFC Platinum ibixegisa kubadlali abaphakathi laphakathi kwenkundla. Ngokungena kukaWadi, ngibona angathi sesilungisise saphelela,” nguMapeza lo ebika ngemva kokugijimisa ithimu yakhe.
UMapeza wakutsho kudala ukuthi ulesifiso sokuqeqetsha uWadi. UWadi ngumgadli weBulawayo Chiefs owahlohla amabhola amanengi ukwedlula bonke. Umdlali lo wayekhangelelwe ukuthi athengwe yiHighlanders ngesikhathi isaqeqetshwa nguBongani Mafu.
Iphephandaba likazulu liphethe eliqotho elithi uMapeza watshayela umqeqetshi weBulawayo Chiefs uThulani Sibanda emazisa ngoWadi isizini edluleyo ingakagqitshwa.
“Ngemva kokuhawukela umdlalo kaWadi, uMapeza kafihlanga ukuthi uyamfuna umdlali lo eqenjini lakhe.
“Sibafisela inhlanhla abafana bethu,” nguSibanda lo umqeqetshi weChiefs.
