uMthunywa
YiNtatheli kaMthunywa
ZIBABAZA zingaqedi izakhamizi zesigabeni seMasuswini, eLupane ngemva kokuba elinye ikhehla lakule indawo libanjwe xhaka lincinda uluju lwemvelo lomalukazana walo qede lathi liyamthatha.
Isiga lesi senzakale kuviki ephelileyo lapho uMnumzana Methuseli Moyo atholwe ngumntanakhe, uMnumzana Joram Moyo elele lomalukazana wakhe, uNkosazana Ruth Ndlovu emkulwini.
UMthunywa uxhumane loNkosazana Sibonokuhle Ndebele oyisakhamuzi sakule indawo walandisa ngendaba le ethi yena wabona kudala ukuthi ababili laba bayathandana.
“Kwathi kuntambama ngezwa umsindo koMoyo ngagijima ngaya khona. Ekufikeni kwami ngathola uMoyo esilwa lomntanakhe omakhelwane bezama ukubalamula. Sithe sibabuza ukuthi babangani uMoyo wathi uthole uyise elele lomkakhe.
“Lokhu akuzange kwangethusa ngoba ngangivele ngisazi ukuthi bayathandana njalo lesigaba sonke siyakwazi. Okwangimangalisayo yikuthi sathi sibabuza uMoyo wathi uzamthatha umalukazana wakhe ngoba uyamthanda,” kuveza uNkszn Ndebele.
Ebuzwa ngale indaba uMnu Joram uvumile ukuthi uyayazi njalo iyamdanisa kakhulu.
“Kuliqiniso sibili ukuthi ngathola ubaba elele lomkami ngokunjalo indaba le iyangimangalisa kakhulu ngoba kangikaze ngikuzwe lokhu. Noma kunjalo kangisela ndaba layo ngoba sahle sehlukana lomkami ngizathatha omunye,” kutsho uMnu Moyo.
UNkszn Ndlovu ubikele intatheli ukuthi umkakhe wayengasahlali ekhaya yikho wathandana loyisezala.
“Mina umkami wayengasahlali ekhaya etshona esetshwaleni njalo besokulomunye abesethandana laye yikho okwenza ngathandana lobabazala. Noma kunjalo sesikhulumisene njengomdeni sayilungisa indaba le,” kutsho uNkszn Ndlovu.
Imizamo yokukhulumisana loMnu Methuseli Moyo yehlule ngoba ucingo lwakhe alubanjwanga muntu.
