uMthunywa
YiNtatheli kaMthunywa
NGENXA yokuthanda ugazana, kulexhegu leGokwe elivuthuze umkalo ngophini ngoba emncitshe umlenze wenkukhu, uMthunywa ukuzwile lokhu.
Ixhegu leli uSamson Makwenjere elileminyaka engu-60 elidabuka esiqintini seNyoka umiswe phambi komthethwandaba wenduna uNemangwe ngemva kokubhula umkakhe, uKerina Makwenjere ngoba enike isivakatshi umlenze wenkukhu.
Kuzwakale ukuthi ngeviki edluleyo, umkamsolwa waphakulela isihlobo esasivakatshile umlenze wenkukhu, into eyacunula umsolwa waze wachitha isitshebo.
Kubikwa umsolwa wachothoza umkakhe esithi kungani esipha isethekeli umlenze okumele udliwe ngubaba womuzi.
Ngalokhu kubikwa waqalisa ukutshaya umamangala, wasedobha uphini watshaya umamangala umzimba wonke waze walanyulelwa yisethekeli leso.
Umamangala wagijima wayabikela amapholisa esigaba umsolwa wabotshwa.
Umsolwa ulivumile icala lakhe wasesithi umkakhe watshengisa ukumdelela yikho nje wamtshaya.
Udaba lolu kubikwa luzaqhubekela phambili ukuthonisiswa ngeviki ezayo mhlaka 27 Nhlolanja.
